Daxldorlik hissi bilan yashashimiz kerak

Oliy Majlis Qonunchilik palatasining navbatdagi majlisi “Oʻzbekiston Respublikasi Konstitutsiyasi toʻgʻrisida” gi Oʻzbekiston Respublikasi Konstitutsiyaviy qonuni loyihasi muhokamasiga bagʻishlandi.

Bu jarayonni bevosita kuzatdim. Yigʻilishda taʼkidlanganidek yangilanayotgan Konstitutsiyamiz loyihasini ishlab chiqishda keng jamoatchilik, siyosiy partiyalar, jamoat tashkilotlari, ekspertlik va ilmiy doiralar vakillari, ziyolilar faol ishtirok etib, umumxalq muhokamalarida 220 mingdan ziyod taklif kelib tushgan. Bu nimadan dalolat? Albatta xalqimizning huquqiy madaniyati rivojlangani va oʻzi hamda davlat kelajagiga befarq emasligidan guvohlik beradi.

Ushbu jarayonda meni judayam quvontirgan masala Konstitutsiya loyihasida yoshlarimiz masalasiga ham alohida eʼtibor berilib, ularning taʼlim olishi, ijtimoiy va tibbiy himoyasi, uy-joyli boʻlishi, bandligi uchun shart-sharoitlar yaratish davlatning konstitutsiyaviy majburiyati ekani belgilanmoqda. Shuningdek, Bosh qomusimizda yoshlar uchun alohida bob ajratilmoqda.

Bu esa Davlatimizning biz yoshlarga bergan eng katta imkoniyati desak mubolagʻa boʻlmaydi. Biz bu imkoniyatlarni qadrlashimiz, sharoitlardan unumli foydalanishimiz va Vatanimiz kelajagiga daxldorlik hissi bilan yashashimiz kerak.

Abbos Shodmonqulov,
Oʻzbekiston “Adolat” SDP Pastdargʻom tuman
Kengashi “Yosh adolatchilar qanoti” raisi.