Deputat aholi murojaatlarini oʻrgandi

Oliy Majlis Qonunchilik palatasi deputati Maxfurat Xushvaqtova Koson tumanidagi Mullali qishlogʻi aholisi bilan yuzma-yuz muloqot uyushtirdi. Qishloq odamlari deputat bilan muloqot asnosida oʻzlarini qiynab kelayotgan muammolarni ham aytib oʻtdilar. Xususan qishloqning ichki yoʻllari taʼmirtalab. Aholining yil sayin koʻpayishi va yangi uy-joylar barpo etilishi hisobiga mavjud transformator talabga javob bermay qolgan. Eskidan oʻrnatilgan simyogʻochlar ham eskirib yaroqsiz holatga kelib qolgan. Maxfurat Xushvaqtova aholidan tushgan bu kabi muammolarni mutasaddilar ishtirokida oʻrganib, kamchiliklarni bartaraf etish yuzasidan masʼullarga tegishli koʻrsatma va topshiriqlar berdi.

Shuningdek, qishloqdagi 41-maktab tadbirgohida mahalla aʼzolari, oʻqituvchilar, yoshlar va xotin-qizlar vakillari huzurida yangilanayotgan Konstitutsiyamiz mazmun-mohiyatini tushuntirdi.Soʻnggi olti yilda erishgan yutuqlarimiz haqida toʻxtaladigan boʻlsak, xalq farovonligi uchun juda koʻplab ezgu ishlar amalga oshirilganiga guvoh boʻlamiz,-dedi Maxfurat Xushvaqtova.- Xususan, iqtisodiyot, inson huquqlari, odil sudlov, soʻz va eʼtiqod erkinligi, ijtimoiy himoya sohalaridagi yuzlab cheklovlarning olib tashlangani, naqd pul, valyuta, kredit masalalaridagi muammolar hal qilingani, qoʻshnilarimiz bilan oramizdagi 25 yillik “muzlar erigani” va boshqa ijobiy harakatlardan koʻz yuma olmaymiz.

Bu yutuqlar, huquq va erkinliklardan nafaqat hozirgi, balki kelajak avlodlarimiz ham emin-erkin foydalanishi uchun, ularni, albatta, Konstitutsiyada muhrlab qoʻyish talab etiladi. Shu tufayli ham Konstitutsiyamizga juda katta oʻzgartirishlar va normalar kiritilyapti.

Deputat yangilanayotgan Konstitutsiyaga kiritilayotgan siyosiy, iqtisodiy, ijtimoiy oʻzgarishlarni ishtirokchilarga batafsil tushuntirdi. Davlatimiz rahbari tomonidan Oʻzbekistonda qonun ustuvorligini taʼminlash borasida keng qamrovli ishlar olib borilayotganini qayd etdi.

-Barcha masalalar yechimi chinakam xalq ovozi boʻlgan mahalla darajasiga tushiriladi,- dedi deputat. Shuni ham alohida taʼkidlash kerakki, fuqarolarning oʻzini oʻzi boshqarish organlari davlat hokimiyati organlari tizimiga kirmasligi belgilab qoʻyilmoqda. Konstitutsiyamizda mazkur kafolatning belgilanishi mahallalarga oʻz hududini mustaqil boshqarish, aholi manfaatlaridan kelib chiqib davlat bilan sheriklik asosida muammolarni hal etib borish, hududni ijtimoiy-iqtisodiy jihatdan rivojlantirish, samarali jamoatchilik nazoratini amalga oshirish huquqi berilyapti.Deputat tumandagi Maydayobu, Surxon, bundan tashqari Mirishkor tumanidagi Pomuq qishlogʻi tomoshagohida, Jeynov qishlogʻidagi 19-maktabda, tuman markazidagi madaniyat va istirohat bogʻida ham fuqarolar bilan samimiy muloqotga kirishib, Konstitutsiyamiz mazmun-mohiyatini oddiy va ravon usulda odamlarga targʻib qildi. Uchrashuvlar yakunida Maxfurat Xushvaqtova keng jamoatchilik vakillarini 30-aprel kuni boʻlib oʻtadigan referendumga qatnashishga chaqirdi.

Doston Nusurov,

“Adolat” SDP Qashqadaryo viloyat

Kengashi yetakchi mutaxassisi.