Deputat aralashgach, bozordagi narx-navo barqarorlashdi

Yangi Oʻzbekistonda har bir odam baxtli yashashga haqli. Odamlar manfaatlari barcha narsadan ustun. Kundalik turmushdagi muammo va kamchiliklar fuqarolarning farovon turmushiga raxna solmasligi kerak. Xalqning fikr va takliflarini eshitish hamda dardu tashvishini yengillashtirish davlat xizmatchilarining burchidir. Bu haqda Prezidentimiz Oliy Majlis va Oʻzbekiston xalqiga yoʻllagan Murojaatnomada hamda kuni kecha mamlakatimizning janubiy viloyati Surxondaryoga tashriflari chogʻida ham buni alohida taʼkidlab oʻtdilar. Shunga asosan xalq deputatlari Mirishkor tuman Kengashidagi Oʻzbekiston “Adolat” SDP deputatlik guruhi aʼzolari tuman markazidan ancha olis mahallalarda yashayotgan fuqarolar holidan xabar olish, muammolarini joyida hal etish orqali ularni hayotdan rozi qilishga intilmoqdalar. Bu borada guruh aʼzosi Sarvinoz Abdullayevaning faoliyati eʼtiborga loyiq.U Jeynov mahallasidagi 30 dan ortiq xonadonlarga tashrif buyurib, aholini qiynab kelayotgan koʻplab muammolarni tingladi, birgalikda muhokama qildi, fikrlashdi va ularning aksariyatiga shu joyning oʻzida yechim topishga erishdi.

Nogiron Gulnoza Shamsixonova oilada keksa ota-onasi bilan yashaydi. Moddiy tomondan juda qiynalib qolishgan. Yuzma-yuz muloqot jarayonida Gulnoza Shamsixonova moddiy yordam olishida koʻmak berishini deputatdan soʻradi. Deputatlik guruh aʼzosi fuqaroning oilaviy ahvolini oʻrganib, unga moddiy yordam zarurligiga ishonch hosil qilgach, Navroʻz bayrami arafasida tuman “Saxovat va koʻmak” jamgʻarmasidan 1 million 800 ming soʻm pul va zarur oziq-ovqat mahsulotlari berilishiga koʻmaklashdi. Bundan tashqari, deputat ehtiyojmand Xadicha Toirova oilasiga ham homiylar ishtirokida 940 ming soʻm moddiy yordam ulashdi.

Deputat Jeynov MFY fuqarolari bilan uchrashuv oʻtkazganida Murodulla Avazov va boshqalar qishloqdagi bozorda unning narxi asossiz ravishda oshib ketayotganidan shikoyat qilishdi. Deputat buni darhol nazoratga oldi va tuman soliq idorasi masʼullari bilan noqonuniy narx-navoni koʻtarib yuborayotgan tadbirkorlarga nisbatan chora koʻrildi.                                                               

“Adolat” SDP Qashqadaryo viloyat

                                                                    Kengashi  Matbuot xizmati.