Deputat aralashgach, mahallaga yangi transformator oʻrnatiladigan boʻldi

Qarshi shahridagi “Aralovul” mahallasida 9 373 nafar fuqarolar 1886 ta xonadonda istiqomat qiladi. Ularning muammolarini oʻrganish, dard-u tashvishlarini bartaraf etish maqsadida xalq deputatlari Qashqadaryo viloyat Kengashidagi Oʻzbekiston “Adolat” SDP deputatlik guruhi rahbari Ruiddin Raupov bugun odamlar bilan yuz-yuz muloqot qildi.

Uchrashuvda deputat Prezidentimiz tomonidan xalq farovonligini oshirish, mahallalarni obodonlashtirish uchun keng koʻlamli islohotlar amalga oshirilayotganini taʼkidladi. Shu kuni deputat MFY raisi Nurjahon Murodov, hokim yordamchisi Aziz Pirnazarovlar hamkorligida 30 ga yaqin oilalarda boʻlib yurtdoshlarimizni qiynab kelayotgan muammolari bilan qiziqdi.

Jarayonda aholi Dunyo koʻchasida umrguzaronlik qilayotgan fuqarolar soni koʻpayganligi sababli yuqori quvvatli transformatorga ehtiyoj tugʻilayotganligini maʼlum qilishdi. Deputat ushbu muammoni shahar hokimligi mutasaddilari bilan bartaraf etishga kelishib oldi. Shuningdek, MFY raisi Nurjahon Murodovning aytishicha, mahalladagi 30 dan ortiq elektr simyogʻochlari eskirganligi sababli beton ustunlarga almashtirilishi zarur.

Qolaversa, jarayonda Yozyovon koʻchasiga tungi yoritgichlar oʻrnatish, Tutak koʻchasining 120 ta xonadonini oqava suv bilan taʼminlash, mahalla fuqarolari yigʻini binosini qayta taʼmirlash, hududda Nuroniylar dam olish maskani barpo etish masalalarida amaliy yordam soʻrab murojaat qilindi. Partiyadoshimiz Ruiddin Raupov mahalladagi shu va boshqa kamchiliklarni mufassal oʻrganib, mutasaddi idoralar masʼullari bilan bartaraf etishga kirishdi.

Deputat shahardagi Kat MFY fuqarolari bilan ham yuzma-yuz muloqotga kirishib, ularning muammolarini ham oʻrgandi.

Oʻzbekiston “Adolat” SDP Qashqadaryo
viloyat Kengashi matbuot xizmati.