Deputat aralashgach, maktab qurilishi jadallashdi

Oliy Majlis Qonunchilik palatasi deputati Maxfurat Xushvaqtovaning Muborak tumanidagi saylovchilari bilan uchrashuvlarida fuqarolarni qiynab kelayotgan koʻpgina muammolar oʻz yechimini topdi. Tuman hokimligi tadbirgohida deputat maktabgacha taʼlim muassasalari masʼullari bilan uchrashdi. Yuzma-yuz muloqot tarzida boʻlib oʻtgan uchrashuvda bogʻcha mudiralari tizimdagi yutuqlar va muammolar xususida maʼlum qilishdi.

Tumandagi 3-sonli bogʻchada toza ichimlik suvi taʼminoti qoniqarli emas. Qattiq va yumshoq jihozlar ham eskirib qolgan. Bogʻchaga tashrif buyurgan deputatga muassasa rahbari Mamlakat Rahmonova shu xususida yordam berishini soʻrab murojaat qildi. Deputat bu muammoni tumandagi mutasaddi idoralar vakillari bilan bartaraf etishga erishdi.

Tumanda kam taʼminlangan, boquvchisini yoʻqotgan “Ayollar daftari”, “Temir daftari”ga kiritilgan 26 nafar xotin-qizlarga oʻtgan yili uy-joy ajratildi. Shu kecha kunduzda ham tumanda xotin-qizlar muammolari masʼullar tomonidan oʻz joyida bartaraf etib kelinmoqda. Bu haqda deputatga fuqarolar toʻlqinlanib gapirishdi.

Deputat Istiqlol MFY hududida barpo etilayotgan yangi maktab binosi qurilishini koʻzdan kechirdi. Tuman xalq taʼlimi boʻlimi rahbari Ixtiyor Usmonovning maʼlum qilishicha keyingi paytlarda, negadir qurilish ishlari paysalga solib kelinmoqda. Deputat muammoni obdon oʻrganib, tuman hokimligi qurilish boʻlimi va tegishli mutasaddilarni jalb etgan holda masalaga oydinlik kiritdi. Maktab qurilishi uchun yetarli mablagʻ ajratilib, ayni paytda bunyodkorlik ishlari jadallashdi.

Mirishkor tumanidagi Pomuq qishlogʻi aholisi azaldan chorvachilik bilan shugʻullanib keladi. Mahalladan Respublikaga taniqli polvonlar yetishib chiqqan. Deputat hududdagi fuqarolari bilan uchrashganida odamlar qishloqdagi barcha qulayliklarga ega boʻlgan yirik tomoshagoh foydalanilmasdan kelinayotganligini maʼlum qilishdi. Buning ustiga yil sayin fuqarolar qadami uzilib borayotganligi tufayli tomoshagoh nurab qolgan. Shu tufayli tomoshagohni yoshlar uchun foydalanishga berish zarur. Fuqarolar shu muammoni bartaraf etishda deputatdan yordam soʻrashdi. Ayni paytda partiyadoshimiz bu muammoni bartaraf etish yuzasidan tegishli vazirlik va idoralar bilan muloqot qilmoqda.

Humoyun Roʻziyev,
deputat yordamchisi.