Deputat “Jaloyir” MFYda uchrashuv oʻtkazdi

Oliy Majlis Qonunchilik palatasi deputati Gulruh Agzamova joylardagi oʻrganishlari davomida Sergeli tumanidagi “Jaloyir” mahallasida ham boʻlib, mahalla idorasi masʼullari va faollar bilan muloqot qildi. Mahalla raisining maʼlum qilishicha, bugungi kunda mahalla hududidan oʻtgan tez yurar poyezd yoʻli ustiga Toshkent shahar hokimligi tomonidan osma koʻprik qurilmoqda. Mahalla raisi deputatdan ushbu poyezd yoʻlidan odamlar oʻtishi uchun piyodalar yoʻlagi ham qurib berilishida yordam koʻrsatishini soʻradi.

Ushbu mahallada 3500 nafar kishi istiqomat qiladi. Bu yerdan har kuni qanchadan-qancha odamlar ishga, oʻqishga, bolalar esa maktabga, bogʻchaga qatnashiga toʻgʻri keladi. Hududdagi poyezd yoʻlidan oʻtish juda xavfli boʻlganligi uchun koʻplab insonlar bilan baxtsiz hodisalar yuz bermoqda.

Shuningdek, jarayonda mahallada gaz bosimi pastligi aytildi. Qoʻshni mahallalardan oʻtgan gaz quvurlaridan kelayotgan tabiiy gaz bosimi aholi ehtiyojlarini qondira olmayotganligi qayd etildi. Qolaversa, ayni vaqtda ushbu mahallada tibbiyot maskani ham mavjud emas. Yerli aholi bir necha kilometr uzoqlikdagi 10-sonli poliklinikaga qatnaydi. Mahalla faollari hech boʻlmaganda statsionar koʻrinishdagi tibbiyot punkti qurilishi kerakligi boʻyicha murojaat qilishdi.

Deputat G.Agzamova ushbu masalalarga atroflicha yondashib, tegishli joylarga deputatlik soʻrovi chiqarish orqali muammoni hal etishda yordam berajagini bildirdi.

Mehriniso YAKUBOVA,

“Adolat” SDP Toshkent shahar kengashi matbuot kotibi