Deputat koʻmagida 22 nafar qizlar bandligi taʼminlandi

“Adolat” SDP Gʻuzor tuman Kengashi tomonidan tumani Sherali MFYda “Bizning bosh maqsadimiz – aholi bandligi” mavzusida uchrashuv tashkil etildi. Unda partiya faollari, mahalliy Kengash deputatlari va tuman yoshlar qatnashdi. Tadbirda qatnashgan deputatlar yoshlarni qiziqtirgan koʻpdan-koʻp savollarga javob qaytardilar. Ayniqsa uyda ishsiz yurgan 34 nafar kam taʼminlangan oilalarning farzandlari deputatlar koʻmagida mavsumiy ishlarga jalb etilgani ayni muddao boʻldi. Biz ularning ayrimlari bilan muloqot qildik.

— Men “Adolat” SDP faollari va deputatlar koʻmagida tumanimiz markazidagi maishiy xizmat Shahobchasiga ishga joylashdim,- dedi Sevinch Toʻrayeva.- Bundan juda xursandman. Ayni paytda ota-onamga, oilamiz byudjetiga yordamim tegayotir.

-Tuman partiya kengashi tomonidan yoshlar bilan uyushtirilgan uchrashuvda qatnashganim men uchun foydali boʻldi,- dedi yana bir ishtirokchi Umid Farmonov.- Deputatlarga uyda ishsiz qolganim, ijtimoiy foydali mehnat bilan shugʻullanishimga yordam berishlarini iltimos qilgandim. Meni murojaatimni inobatga olib yakka tartibdagi tadbirkorlik bilan shugʻullanishimga kerakli hujjatlarni rasmiylashtirishda va bankdan kredit olishga koʻmaklashishdi. Hozir men doʻkon ochib, savdo- sotiq bilan shugʻullanyapman.

Prezidentimiz Qashqadaryo viloyatiga safarlari chogʻida fuqarolarni kasanachilik ishlariga koʻproq jalb etishga alohida eʼtibor qaratgan edilar. Shu tufayli ham masʼullar uchrashuvda qatnashgan 22 nafar ishsiz qizlarni uyda kasanachilik ishlariga jalb etishdi. Ayni paytda ular turli yoʻnalishdagi tikuvchilik pazandachilik va boshqa ishlar bilan band.

Darvoqe, partiyaning “Bir oyda bir ish oʻrni” loyihasi doirasida partiya tashkilotlari tomonidan tumanda aholi bandligini taʼminlash borasida keng qamrovli ishlar olib borilyapti.

Bahrom Mustafoyev,
“Adolat” SDP Gʻuzor tuman Kengashi raisi.