Deputat koʻmagida bolalar oʻyingohi quriladi

Davlatimiz rahbarining Oliy Majlisga hamda Xalqimizga yoʻllagan Murojaatnomasida fuqarolar tomonidan koʻtarilayotgan har bir muammo mutasaddilar tomonidan joyida oʻrganilib, hal etilishi qayd etilgan. Shunga asosan, Oʻzbekiston “Adolat” SDP Qashqadaryo viloyat Kengashi faollari hamda hududdagi deputatlar mahallalarga tashrif buyurib odamlarning dard-u tashvishini, muammolarini oʻrganmoqdalar.

Bugun partiya faollari va deputatlardan iborat tuzilgan ishchi guruhi Qarshi shahridagi “Shoʻrtangaz” MFY xonadonlarida boʻlib mahalla aʼzolari bilan muloqot uyushtirdi. Ayni paytda mahallada 1382 ta xonadon boʻlib, ularda 3820 nafar fuqaro istiqomat qiladi. Guruh aʼzolari dastlab, aholi xonadonlarida boʻlib, Elmira Bozorova, Gulfira Oʻroqova, Gulnora Rahimova, Malika Choriyeva kabi 20 dan ortiq fuqarolar bilan uchrashishdi.

- Oilada boquvchim yoʻq, -deydi Gulfira Oʻroqova. — Shu tufayli moddiy yordamga ehtiyoj sezyapman. Menga moddiy yordam olishimda yordam bersangizlar yaxshi boʻlardi.

- Men esa yolgʻiz onaman,- deydi MFY aʼzosi Yulduz Tolipova. — Uy-joyga muhtojman. Shahrimizda barpo etilayotgan koʻp qavatli uylardan menga ham ajratishsa, nur ustiga aʼlo nur boʻlar edi.

Shu kuni “Adolat”chilar va deputatlar Anvara Shodiyeva, Komila Tursunovalar xonadonlarida ham boʻlishdi. Fuqarolarni oʻylantirib kelayotgan muammolarini mutasaddi idoralar hamkorligida oʻrganib chiqib bartaraf etishdi. Uyda oʻtirgan 10 nafardan ortiq ayollar mavsumiy ishlarga jalb etildi.

Koʻp qavatli uylar xonadonlarida boʻlgan partiyadoshlarimiz bir qator fuqarolarni shu kecha kunduzda tashvishga solib kelayotgan muammoga  duch keldilar. Fuqarolarning aytishicha, mahallaning koʻp qavatli uylariga kirish yoʻl va yoʻlaklari taʼmirtalab boʻlib qolgan. Ikki kilometr yoʻlni asfaltlash zarur. Yangi oʻtkazilgan isitish tizimi koʻp qavatli uylarning yertoʻlasigacha kelgan. Ammo xonadonlarga kiritilmagan. Shu sababli oilalarga issiqlik quvurini ulab berish uchun fuqarolar koʻmak koʻrsatilishini iltimos qilishdi.

Oʻrganishlar davomida aniqlangan barcha kamchiliklar Xalq deputatlari Qashqadaryo viloyat Kengashidagi Oʻzbekiston “Adolat” SDP deputatlik guruhi rahbari Ruiddin Raupov boshchiligidagi Xalq vakillari tomonidan nazoratga olindi. Ayrim muammolar shahar hokimligi va masʼul idoralar hamkorligida joyida hal etildi. Deputat saʼy harakati bilan 3-,14-,12-,27-, 34 – koʻp qavatli uylar yonida bolalar oʻyingohi bunyod etish uchun shahar hokimligidagi masʼullarga tegishli koʻrsatmalar berildi.

“Adolat” SDP Qashqadaryo viloyat Kengashi
matbuot xizmati.