Deputat minbari: Qo‘shma sayyohlik yo‘nalishlarini yaratish — diqqat markazida bo‘ladi

Shu kunlarda Samarqand shahri yana bir nufuzli xalqaro anjuman — Butunjahon turizm tashkiloti (YUNVTO) Bosh assambleyasining 25-sessiyasiga mezbonlik qilmoqda. Unda 140 dan ziyod mamlakat vakillari ishtirok etmoqda.

YUNVTO o‘zining bosh tadbiri uchun Samarqandni tanlab olgani bejiz emas, bunda chuqur ramziy ma’no bor. Ushbu ko‘hna va hamisha navqiron shahar azal-azaldan tarixiy uchrashuvlar va sivilizatsiyalar almashinuvi markazi bo‘lib kelgan. Bu yerda turli madaniyatlar o‘zaro uchrashib, bir-birini to‘ldirib, boyitib kelganligi hech kimga sir emas. Bunga misol sifatida o‘rta asrlarda faoliyat yuritgan Buyuk ipak yo‘lini eslashning o‘zi kifoyadir.

Hozirgi kunda ham Sharq “gavhari” bo‘lmish Samarqand mamlakatimizning eng muhim xalqaro va diplomatik tashabbuslarini ilgari surish uchun o‘ziga xos platforma vazifasini o‘tamoqda. So‘nggi yillarda bu yerda xalqaro va mintaqaviy ahamiyatga molik qator tadbir va anjumanlar o‘tkazilganligi fikrimizning yorqin dalilidir. Masalan, “Markaziy Osiyo: yagona o‘tmish va umumiy kelajak, barqaror rivojlanish va farovonlik yo‘lidagi hamkorlik” mavzuidagi xalqaro konferensiya (2017 yil) , Inson huquqlari bo‘yicha Osiyo forumi (2018 yil) Inson huquqlari bo‘yicha Samarqand forumi (2020 yil), SHHT davlat rahbarlari sammiti (2022 yil) kabi qator yirik forumlar aynan Samarqandda o‘tkazildi.

Ta’kidlash joizki, YUNVTOning Samarqand anjumaniga qizg‘in tayyorgarlik ko‘rildi. Sammit doirasida O‘zbekistonning barcha hududlari sayyohlik potensialini namoyish qiluvchi ko‘rgazmaning tashkil qilingani ayni muddaodir. Bu anjumanga tashrif buyurgan mehmonlarda O‘zbekiston, uning betakror va noyob durdonalari hamda turistik imkoniyatlari haqida to‘liq tasavvurga ega bo‘lish imkonini beradi.

O‘zbekiston Prezidenti Shavkat Mirziyoyev Butunjahon turizm tashkiloti (YUNVTO) Bosh assambleyasining 25-sessiyasidagi nutqida sohani rivojlantirishga qaratigan bir qator muhim tashabbuslarni ilgari surdi.

Prezident o‘z chiqishida mamlakatimizning sayyohlik sohasidagi yutuqlari bilan o‘rtoqlashar ekan, bu boradagi istiqbolli vazifalarga ham alohida to‘xtalib o‘tdi. Turizmning nafaqat ko‘hna tarixiy obidalar yo‘nalishi haqida, balki ziyorat turizmi, “yashil”, ya’ni ekologik turizm, inklyuziv turizm kabi yo‘nalishlarini rivojlantirish dolzarbligini qayd etdi.

Mamlakatimiz yetakchisi BMT doirasida Global xavfsiz turizm kodeksini ishlab chiqishni taklif qildi hamda yaqinda Samarqandda ochilgan turizm sohasi uchun kadrlar tayyorlash va ularning malakasini oshirish bo‘yicha dunyoda o‘xshashi yo‘q YUNVTO Xalqaro turizm akademiyasida mutaxassislarni o‘qitish uchun maxsus grantlar ajratilishini e’lon qildi.

Ayniqsa, Markaziy Osiyodagi qo‘shni davlatlar bilan turizm sohasida hamkorlikda turli loyihalarni yo‘lga qo‘yish yaxshigina istiqbolga egaligini alohida ta’kidladi. “Markaziy Osiyo davlatlari bilan qo‘shma sayyohlik yo‘nalishlarini yaratish masalalari diqqat markazida bo‘ladi”— dedi Prezident.

Bir so‘z bilan aytganda, ushbu nufuzli xalqaro anjumanning Samarqandda o‘tkazilishi va unda O‘zbekiston tashabbuslarining e’lon qilinishi, shubhasiz, mamlakatimizning xalqaro obro‘-nufuzini mustahkamlashga va pirovardida, xalqimiz farovonligini oshirishga qaratilgan. Endigi vazifa ushbu tashabbuslarni hayotga izchillik bilan tatbiq etishdan iborat. Bu, eng avvalo, davlat boshqaruvi organlari, xususan, ijro hokimiyatidan barcha imkoniyatlarni safarbar qilishni, deputatlardan esa bu borada deputatlik va parlament nazoratining ta’sirchan mexanizmlarini kuchaytirishni taqozo etadi.

 Qodir JO‘RAYEV,

Oliy Majlis Qonunchilik palatasi deputati