Deputatlar aholi muammolariga befarq emas

Bugungi kun deputati hayotga boshqacha nigoh bilan qarashi, uni ziyrak kuzatishi kerak. Qaysidir hududda aholini oʻylantirib, qiynab kelayotgan muammolar boʻlsa, uni oʻz holiga tashlab qoʻymasligi zarur. Zero, deputatni xalq saylagan, u bildirilgan ishonchga munosib boʻlmogʻi lozim.

Xalq deputatlari Oqqoʻrgʻon tuman Kengashidagi Oʻzbekiston “Adolat” SDP deputati Alisher Qurbonov ham xalqning ishonchli vakili sifatida aholi muammolarini birinchi boʻlib oʻrganmoqda, ularning yechimini taʼminlashga harakat qilmoqda.

Yaqinda unga tumanda yashovchi fuqarolaridan hududdan oʻtgan markaziy Nurafshon, Oqqoʻrgʻon va Doʻstobod yoʻllari boʻyida joylashgan 3, 4, 38, 9, 11, 43, 31-umumiy oʻrta taʼlim maktablarining yoʻllari atrofiga oʻquvchilar uchun yoʻl belgilari, nazorat kameralari va svetoforlar oʻrnatish zarur ekanligi boʻyicha murojaat kelib tushgan edi. Xalqning ishonchli noibi mazkur masala boʻyicha deputatlik soʻrovi bilan Oqqoʻrgʻon tumani IIB YHXB boshligʻi kapitan Iskandar Rahmatullayevga chiqdi. Natijada muammo tez orada ijobiy hal etildi.

Mahallamiz koʻchasidan bolalarimiz maktabga qatnaydi. Maktab atrofidagi yoʻllarda yetarlicha xavfsizlik choralari koʻrilmagan, — deydi “Navroʻz” MFY fuqarosi Tursunmurod Turopov. – Ancha yillardan beri maktabimiz koʻchalari atrofiga oʻquvchilar uchun yoʻl belgilari, nazorat kameralari va svetoforlar oʻrnatish muammo boʻlib kelayotgan edi. Toʻgʻri, bu masalalar yuzasidan viloyat va tuman hokimligi, yoʻl harakati xavfsizligi boʻlimiga koʻp bora murojaat qilganmiz. Lekin, ular: “yaqin kunlarda hal etib beramiz” deyishdan nariga oʻtishmagandi. Shu boisdan bu masala boʻyicha deputat Alisher Qurbonovga murojaat qildik. Shukurki, uning tashabbusi bilan necha yillik muammomiz ijobiy hal boʻldi. Shunisi quvonarliki, 3, 38, 11, 9-umumiy oʻrta taʼlim maktablarida “Yoʻl harakati xavfsizligi xonasi” va “Yoʻl harakati qoidalarini oʻrgatuvchi maydon” kabi oʻquv xonalari tashkil etildi.

Ha, bugun Oʻzbekiston “Adolat” SDP deputatlari xalq bilan doimiy muloqotda boʻlib, oddiy odamlarning dardu tashvishlari bilan yashamoqda. Ularning jonbozligi bois, necha yillardan buyon odamlarni qiynab kelayotgan muammolar qisqa fursatda ijobiy hal etilmoqda.

Oʻzbekiston “Adolat” SDP Toshkent viloyat Kengashi mazkur masalani ijobiy hal etishda deputatga amaliy yordam berganligi uchun Oqqoʻrgʻon tumani IIB YHXB boshligʻi kapitan Iskandar Rahmatullayev hamda tuman Yoʻl harakati xavfsizligi boʻlimi inspektorlariga tashakkurnoma taqdim etdi.

Oʻzbekiston “Adolat” SDP Toshkent viloyati kengashi
Matbuot xizmati.