Deputatlar safi kengaymoqda

Xalq deputatlari Pop tuman kengashining navbatdagi sessiyasi boʻlib oʻtdi. Unda hududiy ijtimoiy-iqtisodiy rivojlantirish bilan bogʻliq qator masalalar koʻrib chiqildi. Sessiya boshlanishida partiyadoshlarimiz uchun quvonchli voqea roʻy berdi. Tuman hokimi xalq deputatlari tuman kengashi raisi Azamjon Sultonov yangi saylangan deputat Azimjon Kenjaevga guvohnomani tantanali vaziyatda topshirdi.

- Bu bilan tuman kengashidagi guruhimiz aʼzolari soni yana bir kishiga koʻpaydi, — deydi Poplik “Adolat”chilar yetakchisi Zokirjon Hasanov. Safdoshlarimiz faoliyatini yanada kuchaytirish uchun imkoniyat yaratildi. Shundan kelib chiqib, avval ishlab chiqilgan rejalarga ham oʻzgartirishlar kiritildi.

Poplik partiyadoshlarimizning muvaffaqiyati haqida gap borar ekan, ular kadrlar zaxirasini yaratishga katta eʼtibor qaratayotganliklarini taʼkidlash zarur. 2019-yilgi saylovlar yakunlanishi bilanoq deputatlikka koʻrsatish uchun yangi nomzodlarni shakllantirishga kirishildi. Faol jamoatchi hayotiy tajribaga va aholi oʻrtasida obroʻga ega insonlar bilan ish olib borildi. Oʻtgan uch yil mobaynida “Adolat”chilardan 4 kishi deputatlikka saylangani diqqatga sazovordir. Azimjon Kenjaev saylangan 27-Oltinkon saylov okrugi Popning olis togʻoldi Chodak qishlogʻi xududida joylashgan. Bu erda yechilishi kutayotgan qator iqtisodiy-ijtimoiy muammolar bor. Ulardan deputatimiz yaxshi xabardor. Chunki u shu erda tugʻilib oʻsgan. Andijon muhandislik iqtisodiy institutni bitirgan, oliy maʼlumotli mutaxassis. Ayni paytida Olmaliq togʻ metalorgiya kombinatiga qarashli Chodaksoy 3-avtokorxonasida mexanik boʻlib ishlaydi. Uning saylovda yutib chiqishiga puxta ishlab chiqilgan dastur ham sabab boʻldi. Chunki aholi Azimjon mahalliy sharoit va mavjud muammolardan voqibligini saylovoldi uchrashuvlardagi fikrlaridan bilib oldilar.

- Men deputatlik amal yoki martaba emasligini yaxshi tushunaman,- deydi A.Kenjaev. — Bildirilgan ishonchni oqlash uchun astoydil harakat qilaman. Bunda partiyadoshlarimizning yordamiga ham tayanaman. Maqsadim — “Adolat” SDPning nufuzi yanada oshishiga munosib hissa qoʻshish.

Nurbek Abdullaev,

“Adolat” SDP Namangan viloyat Kengashi matbuot kotibi.