Ishonch oqlanmoqda

Keyingi yillarda jamoatchilikning mahalliy kengash deputatlari faoliyatiga eʼtibori, saylovchilarning oʻz vakillariga talabi ortib bormoqda. Bugun deputat yigʻilish yoki sessiyalarda shunchaki qatnashish bilan cheklanib qolmaydi. Hududlardagi muammolarni hal etishi, zarur hollarda kengash muhokamasiga olib chiqishi lozim. Aks holda bildirilgan ishonchni oqlay olmaydi. Ish uslubini oʻzgartirishi, shiddatkor zamonga moslashishi ham shart.

Yuqoridagilardan kelib chiqib, xalq deputatlari Andijon shahar kengashidagi “Adolat” SDP Deputatlik guruhi aʼzolari oʻz vazifasiga masʼuliyat bilan yondashmoqda. Shu sabab Ibroximjon Mitillayev, Ilhomjon Abdulazizov, Ulugʻbek Ahmedov, Oʻtkirbek Arziqulov va Ziyoviddin Isomiddinovlarga saylovchilarning ishonchi ortib boryapti. Xalq vakillari partiyamiz saylovoldi dasturida nazarda tutilganidek ijtimoiy himoyaga muhtoj hamda kam taʼminlangan fuqarolar manfaatlarining haqiqiy himoyachisi, muammolarining yechimini topishga doim kamarbasta.

Andijon shahridagi mavjud MFYlarda xalq vakillarining muntazam qabuli yoʻlga qoʻyilgan. Deputatlar mahallani oʻz ish joyi deb biladi. Saylovchilar ham aksariyat hollarda eng ishonchli institut sifatida ularga murojaat bilan chiqadi. Har bir murojaat eʼtiborda, yechim topishi shart. Bu joiz boʻlsa “temir qoida”ga aylangan. Agar masala hal boʻlmasa oxirgi chora Deputatlik soʻrovi. Shu yoʻl bilan 2022-yilda 65 ta muammo hal etildi.

Shu oʻrinda bir gap. MFY faollari bilan hamkorlik ijobiy samara bermoqda. Deputatlar doim ular bilan birga. Hududlardagi oʻrganishlar jamoatchilik bilan ishlashda qoʻl kelmoqda.

Safdoshlarimiz “Al-Buhoriy” MFY faollari bilan fuqaro Ibodatxon Xatamova xonadoniga kirib bordilar. Oila ijtimoiy koʻmakka muhtoj. Shu sabab homiylar koʻmagida oziq-ovqat mahsulotlari berildi. Oila aʼzolarining bandligini taʼminlashni nazoratga olindi.

“Andijon” MFYda yashovchi fuqaro Karimaxon Tojiboyeva, “Boʻston” MFYda yashovchi Xilola Payziyeva, “Ahmad Yassaviy” MFYda yashovchi Odinaxon Shermatovalar ham eʼtibordan xursand. Bunga javoban ular jamiyatning faol aʼzolariga aylandi. Bu fuqarolar berilayotgan moddiy yordamga koʻz tikib oʻtirmay aniq bir ish bilan shugʻullanishga kirishayotganida ifodasini topmoqda.

“Turkiston” koʻchasida yashovchi Azamjon Avazxonov kasb-hunar maktabi oʻquvchisi. Boʻsh vaqtida tadbirkorlik bilan shugʻullanish istagida. Deputatlar aralashuvi bilan unga ATB “Qishloq qurilish bank” tomonidan 26 million soʻm kredit berildi. Natijada u chorvachilik faoliyati bilan shugʻullanishni boshladi.

Andijon shahridagi “Trans xamkor” MCHJ rahbari Sh.Baxromov aholiga transport xizmati koʻrsatish bilan shugʻullanadi. Faoliyatini kengaytirish maqsadida moliya muassasalaridan yordam soʻragan. Eʼtiborsizlik sabab uning talabi qondirilmay kelayotgandi.

Deputatlar bu masalani ham oʻz nazoratiga oldilar. Natijada “Qishlok qurilish bank”dan transport vositalariga ehtiyot qismlari sotib olish maqsadida 20 mln. soʻm miqdorida kredit ajratildi. Tadbirkor bundan xursand.

“Kamolot” MFY, Toʻqimachi koʻchasida yashovchilarni ichimlik suv taʼminoti muammosi qiynab kelayotgandi. Shu masalada fuqaro Dilmurod Rahmonovni qilgan murojaati xalq vakillarining eʼtiborini tortdi. Andijon shahar “Suvoqava” korxonasiga chiqarilgan deputatlik soʻrovi ijobiy samara berdi.

Ibroximjon Mitillayev, xalq deputatlari Andijon shahar kengashi deputati:

-Xalq vakili boʻlishlik masʼuliyat. Uning uddasidan chiqish uchun hamma vaqt saylovchilar orasida boʻlish lozim. Ulardan ajralsangiz ishonch ham yoʻqoladi. Shu sabab biz oʻz oʻrnimizni doim mahallada deb bilamiz. Axir bizga saylovchilar ishonch bildirgan.

Ha, deputatlik sharaf va masʼuliyat. Buni xalq deputatlari Andijon shahar kengashidagi mahalliy kengash deputatlari oqlamoqda.

Akbarjon Nazarov,

Andijon.