Diqqat, eʼlon!

Oʻzbekiston “Adolat” SDP Siyosiy Kengashi Markaziy apparati tomonidan anʼanaviy tarzda “Vatan kelajagi yoshlar qoʻlida” loyihasi doirasida “Konstitutsiya bilimdoni” koʻrik tanlovi oʻtkazib kelinmoqda. Joriy yilda koʻrik-tanlov 2023-yil 30-aprel kuni boʻlib oʻtgan Umumxalq Referendumida qabul qilingan Oʻzbekiston Respublikasining Yangi tahrirdagi Konstitutsiyasi asosida tashkil etiladi.

Koʻrik-tanlovning maqsadi yoshlarning Yangi Konstitutsiya boʻyicha bilimlarini yuksaltirish, ularni Oʻzbekiston Respublikasining Yangi Konstitutsiyasiga hurmat ruhida tarbiyalash, ularda faol fuqarolik pozitsiyasini yanada mustahkamlab, huquqiy va siyosiy jihatdan iqtidorli yoshlarni aniqlash va ragʻbatlantirish hamda “Adolat” SDP dasturiy maqsad va vazifalarini targʻib qilishdan iborat.

Shu munosabat bilan joriy yilning 24-oktyabr – 4-noyabr kunlari oraligʻida Respublika boʻylab barcha kollej, texnikumlar va OTMlar tasarrufidagi akademik litseylarining 2-bosqich oʻquvchilari orasida tuman bosqichida ishtirok etish uchun saralash bosqichi oʻtkaziladi.

Koʻrik tanlov partiya tizimida uch bosqichda oʻtkaziladi:

1-bosqich: saralash (tuman, shahar) bosqichi (4 – 14-noyabr oraligʻida);

2-bosqich: hududiy (Qoraqalpogʻiston Respublikasi, viloyatlar va Toshkent shahri) bosqichi (15 – 25-noyabr oraligʻida);

3-bosqich: yakuniy (respublika) bosqichi (25-noyabr – 5-dekabr oraligʻida).

Mazkur koʻrik-tanlovda barcha professional taʼlim muassasalari va oliy taʼlim muassasalari tasarrufidagi akademik litseylarning 1 nafar 2-bosqich oʻquvchilari ishtirok etishlari mumkin.

Aziz yoshlar, yurtimizdagi islohotlarga befarq boʻlmang, Konstitutsiya boʻyicha bilimlaringizni sinab koʻring!

(Koʻrik-tanlovda ishtirok etish uchun mahalliy partiya Kengashlariga murojaat qilishingiz va Nizomga asosan talab etiladigan hujjatlarni taqdim etishingiz lozim.)

“KONSTITUTSIYA BILIMDONI” koʻrik-tanlovining nizozmi