“Doʻstlik” ordeni muborak, Zakirjon aka!

Oʻzbekiston Respublikasi davlat mustaqilligining 32 yilligi munosabati bilan vatanimiz mustaqilligini mustahkamlash, Yangi Oʻzbekistonni barpo etish yoʻlida amalga oshirilayotgan islohotlarga qoʻshgan munosib hissasi, oʻzining yorqin isteʼdodi, keng qamrovli ijodiy, ilmiy-amaliy faoliyati bilan xalqimiz maʼnaviyatini yuksaltirish, mamlakatimizda ilm-fan, taʼlim, adabiyot, madaniyat va sanʼat sohalarini rivojlantirish, yoshlarimizni ona yurtga muhabbat va sadoqat, umuminsoniy qadriyatlarga hurmat ruhida tarbiyalash yoʻlidagi ulkan xizmatlari hamda ijtimoiy hayotdagi faol ishtiroki uchun bir guruh fidoiy vatandoshlarimiz Prezidentimiz Farmoniga koʻra faxriy unvonlar bilan taqdirlandilar. Baxtiyor vatandoshlarimiz orasida bizning partiyadoshimiz, Fargʻona viloyat Kengashi deputati Zakirjon Rahmanovning borligi barchamizni quvontirdi. Xalq deputatlari Fargʻona viloyat Kengashidagi “Adolat” SDP deputatlik guruhi aʼzosi, “Nuroniy” jamgʻarmasining Fargʻona viloyati boʻlimi raisi Zakirjon Rahmanov “Doʻstlik” ordeni bilan mukofotlandilar.

Butun umrini xalq xoʻjaligining rivojiga bagʻishlagan kamtarin bu insonning hayot yoʻllariga nazar tashlar ekanmiz, har bir ishga oʻta masʼuliyat va sabr –qanoat bilan yondashib, uni muvaffaqiyatli ado etilishiga eʼtibor qaratganligi bois erishilgan yutuqlar salmogʻini koʻramiz.Toshkent qishloq xoʻjaligi oliygohini tamomlagan Zakirjon Rahmanov 1980-yilda mehnat faoliyatini Dangʻara tumanidagi “Sirdaryo” davlat xoʻjaligi hisobchiligidan boshlaydi. Tuman agrosanoat birlashmasi iqtisodchisi lavozimlariga bosqichma –bosqich koʻtarilar ekan, oʻzining tashabbuskorligi va tahlilni hush koʻrishi bilan eʼtiborga tushadi. Zakirjon aka Uchkoʻprik, Furqat tumanlari hokimi sifatida ham xalq bilan yuzma- yuz muloqot qilib, dala kezib, dehqonlar bilan tillashib, har bir gektar yer maydonidan yuqori hosildorlikka erishish, mashaqqatli mehnat egalarini manfaatdorligini oshirish, turmush sharoitlarini yaxshilash yoʻllarini izlaydi. Mirishkorlar bilan samimiy muloqotlar, oʻzaro tajriba almashishlar tumanlarni iqtisodiy salohiyatini yuksalishiga zamin yaratadi.

Zakirjon Rahmanov Oʻzbekiston Respublikasi Prezidenti huzuridagi Davlat nazorati qoʻmitasi Dangʻara tuman inspeksiyasi rahbari, Fargʻona viloyat qishloq va suv xoʻjaligi masalalari boʻyicha birinchi oʻrinbosar, viloyat jamoatchilik Kengashi raisi lavozimlarida ham halol mehnat qilib, hurmat va eʼtibor qozonadi.Bugungi kunda “Nuroniy” jamgʻarmasining Fargʻona viloyati boʻlimi raisi vazifasini bajarib kelayotgan Zakirjon Rahmanov “Adolat” SDP Fargʻona viloyat Kengashi deputati hamdir. Koʻplab muammolarga yechim topib, sessiyalarda vazminlik bilan muammolarni hal qilishga intiluvchi salohiyatli deputatimizning bilan davlat mukofoti bilan taqdirlanishi barcha adolatchilarni, faollarni, yoshlarni sevintirdi.

“Adolat” SDP Fargʻona viloyat Kengashi raisi Shahnoza Gʻaniyeva fidoiy deputatni yuksak mukofotlar bilan qutlar ekan, Zakir akaga partiyaning esdalik sovgʻalarini taqdim etdi. Oʻz navbatida soʻz olgan Zakirjon aka Prezidentimizning unga bildirilgan oliy ishonchidan baxtiyorligini taʼkidlar ekan, yurtga fidoiylik, elga sadoqat bilan mehnat qilish baxti orqali erishgan bugungi mukofoti uni va barcha jamoasini, “Adolat” SDP Fargʻona viloyat Kengashi jamoasini zimmasiga katta masʼuliyat yuklashini, adolatchilar safida hamisha xalqimiz baxtli hayoti uchun kurashlardan tolmasligini bildirdi.

Barchamiz “Adolat” SDP Fargʻona viloyat Kengashi deputati Zakirjon Rahmanovni mukofot bilan qutlaymiz. Mustaqillik bayrami barchaga muborak boʻlsin!

“Adolat” SDP

Farg’ona viloyat kengashi Matbuot xizmati.