Dolzarb qonun loyihalari muhokama qilindi

Oliy Majlis Qonunchilik palatasidagi “Adolat” SDP fraksiyasining yig‘ilishida fuqarolarning huquqlari, erkinliklari va qonuniy manfaatlarini himoya qilishga qaratilgan bir qator qonun loyihalari ko‘rib chiqildi.

Xususan, “Litsenziyalash, ruxsat berish va xabardor qilish tartib-taomillari to‘g‘risida”gi O‘zbekiston Respublikasi Qonuniga qo‘shimchalar kiritish haqida”gi qonun loyihasi muhokamalar markazida bo‘ldi.

Ta’kidlanganidek, ushbu qonun loyihasining maqsadi tadbirkorlik subyektlari nodavlat arxivlarni davlat reyestriga kiritish hamda hujjatlarni elektron arxivlash (saqlash) xizmatlarini ko‘rsatuvchi nodavlat arxivlarning ma’lumotlar uzatish tarmoqlari xizmatlarini ko‘rsatish uchun litsenziya olish talabini xabardor qilish tartib-taomiliga o‘tkazishdan iborat.

Taklif etilayotgan qonun loyihasi bilan tadbirkorlik subyektlarigi qo‘shimcha qulayliklar yaratish maqsadida nodavlat arxivlarni tashkil etish xabardor qilish tartib-taomiliga o‘tkazilmoqda.

Fraksiya azolari qonun loyihasini “Adolat” SDP maqsad va g‘oyalari bilan uzviy bog‘liq holda ishlab chiqilgani, uning qabul qilinishi nodavlat arxivlar faoliyatini tashkil etish samaradorligini oshirishga xizmat qilishini qayd etdilar.

Yig‘ilishda muhokama etilgan qonun loyihalarini maromiga yetkazish yuzasidan deputatlarning partiya pozitsiyasidan kelib chiqadigan taklif, mulohazalari tinglandi va fraksiyaning nuqtai nazari belgilab olindi.

Deputatlar yig‘ilishda kun tartibidagi boshqa masalalarni ham muhokama qildilar.