Dorivor oʻsimliklarni yetishtirishda ilm-fan va ishlab chiqarish korxonalari oʻrtasidagi ilmiy aloqalarini yoʻlga qoʻyish – aholi salomatligini mustahkamlashga xizmat qiladi

Mamlakatimizda aholining kundalik hayotida tibbiy madaniyatni yuksaltirish va sogʻlom turmush tarzini yanada yaxshilash boʻyicha qator  islohotlar amalga oshirilmoqda. Xalqimiz azaldan “Sogʻlik — tuman boylik” deb bejizga aytishmagan. Inson uchun bebaho boylik – bu sogʻlik-salomatlikdir. Baxtli-saodatli turmush kechirish uchun insonga avvalo sogʻlik kerak. Biroq, soʻngi yillarda global urbanizatsiya, texnogen tahdidlar, ekologiya, atrof-muhit va ob-havoning oʻzgarishi aholining sogʻlom turmush tarziga oʻz taʼsirini koʻrsatib, turli kasalliklarni keltirib chiqarmoqda.

Qanchalik dori-darmonlar koʻpaymasin, tibbiy muassasalar sifati, shifokorlar saviyasi, tibbiy texnika yaxshilanmasin, agar insonning oʻzi oʻz salomatligi haqida qaygʻurmasa, sogʻlom turmush tarziga rioya qilmasa kutilgan natijaga erishib boʻlmaydi.Bu borada aholi salomatligini yuksaltirish, sogʻlom turmush tarzini tashkil etishga xizmat qiladigan dorivor oʻsimliklarni yetishtirish bugungi kundagi eng dolzarb vazifalardan biri hisoblanadi. Dorivor oʻsimliklarni madaniy holda yetishtirish va qayta ishlash hamda davolashda ulardan keng foydalanish masalasi Oʻzbekiston Respublikasi Prezidentining 2022-yil 20-maydagi  “Dorivor oʻsimliklarni madaniy holda yetishtirish va qayta ishlash hamda davolashda ulardan keng foydalanishni tashkil etish chora-tadbirlari toʻgʻrisida”gi PQ-251-son Qarorida alohida belgilab quyilgan.

Shu maqsadda, Oʻzbekiston “Adolat” SDP Navoiy viloyat Kengashi tomonidan partiya faollari, mahalliy Kengash deputatlari, mutasaddi tashkilotlardan iborat ishchi guruh tuzilib, oʻrganish ishlari olib borilmoqda. Tibbiyot amaliyotida samarasi isbotlangan va asosiy dori vositalari roʻyxatiga kiritilgan dorivor oʻsimliklar va ulardan tayyorlangan dori vositalarining davlat tibbiyot tashkilotlari tomonidan xarid qilinishi yoʻlga quyilgan.Aholining tibbiy madaniyatini oshirish, dorivor oʻsimliklarning afzalliklarini aholi va shifokorlar orasida keng targʻib qilish, dorivor oʻsimliklarni yetishtirish va chuqur qayta ishlashda ilm-fan va ishlab chiqarish korxonalarining aloqalarini yoʻlga qoʻyish xalq tabobati rivoji hamda aholi salomatligiga xizmat qiladi.

Oʻrganishlar davomida, Navoiy viloyatida 2023-yilda qishloq xoʻjaligiga moʻljallangan yer maydonlarida jami 64 gektar yerga qizilmiya, kovrak, naʼmatak, zaʼfaron, lavanda va oddiy qorazira dorivor oʻsimliklar ekilgan boʻlib shundan, Nurota tumanida 52 gektar, Qiziltepa tumanida 12 gektarni tashkil etadi.Qiziltepa tumanida dorivor oʻsimliklar yetishtiruvchi 1 ta klaster tashkil etilgan boʻlib, klaster uchun 8 gektar yer maydoni ajratilgan.

Ishchi guruh tomonidan mutasaddi tashkilot vakillariga aholi va sogʻliqni saqlash muassasalarining dorivor oʻsimliklar mahsulotlari bilan taʼminlanganlik holatini tizimli tahlil qilish, dorivor oʻsimliklar va ulardan ishlab chiqarilgan mahsulotlarning tibbiy ahamiyati hamda ularni qoʻllashga oid maxsus koʻrsatuvlar va roliklarni muntazam namoyish etilishini tashkil qilish takliflari berildi. Partiyamiz tomonidan dorivor oʻsimliklarni joylarda yetishtirish boʻyicha amalga oshirilgan ishlarni jamoatchilik nazorati tartibi oʻrganish tashabbusi sohani yanada rivojlantirish hamda aholi salomatligini mustahkamlashga xizmat qiladi.

R.Xayitov

“Adolat” SDP  Navoiy viloyat Kengashi raisi.