Eʼtibordan koʻngillar shod

Muruvvat va saxovat yurtimizda azaldan yuksak qadriyat hisoblangan. Yordamga muhtoj kishilarga koʻmaklashish, ogʻirini yengil qilish qon-qonimizga singib ketgan ezgu anʼanalarimizdandir. Yurtimizda oʻzgalar dardiga darmon boʻlayotgan, ularga ham moddiy ham maʼnaviy yordam qoʻlini choʻzayotgan saxovatpesha insonlar juda koʻp.

Bugun tarixiy davrning yangi bosqichi – xalqimiz oʻz oldiga ezgu maqsadlar qoʻyib, oʻz kuch va imkoniyatlariga tayangan holda, hamjihatlik ila taraqqiyot sari odimlab borayotgan pallada Xalq deputatlari Shofirkon tuman Kengashiga “Adolat” SDPdan saylangan deputat Zulfiya Ashurova ham ezgu ishga bel bogʻladi.
Yaqinlashib kelayotgan mustaqilligining 32-yilligi arafasida deputat tashabbusi bilan Qalmoqon MFY, H. Olimjon koʻchasida yashovchi 2-guruh nogironi Doʻlanova Gashixonga nogironlik aravachasi va dori-darmon vositalari yetkazilib berildi.
Shu oʻrinda taʼkidlash kerakki, insonga berilgan xayr-saxovat, mehr-oqibat, rahm-shafqat kabi ulugʻ fazilatlar doimo qadrlanib kelingan. Bunday oliyjanob xislatlarni oʻzida mujassam eta olgan insongina el-yurtning ogʻirini yengil qila oladigan fazilatli shaxs hisoblanadi. “Savob ishni har kim, har kuni qilishi lozim”, — degan shiorni har bir inson oʻziga dasturilamal qilib olib, doimo yaxshiliklar qilishi haqiqiy insoniylik sifatini bildiradi.

Zulfiya Ashurovadek saxovatpesha deputatlarimiz safi tobora koʻpayaversin deymiz.

Mohigul Rahimqulova,
“Adolat” SDP Buxoro viloyat Kengashi matbuot kotibi.