El ardogʻidagi ustoz

“Adolat” SDP Buvayda tuman Kengashi raisi Xayrullo Turgʻunovni barcha ustoz, deya hurmat qiladi. Qoʻqon davlat pedagogika oliygohida tahsil olgan Xayrullo aka ilk faoliyatini 1983-yilda tumandagi 32 maktabda jismoniy tarbiya fani oʻqituvchiligidan boshlagan. Yosh pedagog 12 yil davomida qishloq yoshlarini jismonan, ruhan komil inson boʻlib kamol topishlari uchun astoydil harakat qiladi. Hamisha yangi gʻoyalar, yangi tashabbuslar bilan chiqishi tuman, viloyat xalq taʼlimi boʻlimi rahbariyatining eʼtiboriga tushadi. Fidoiy inson 1995-yildan 2012-yilga qadar tuman Buvayda tuman xalq taʼlimi boʻlimida “Favqulodda vaziyatlarda fuqarolar muhofazasi” mutaxassisi va chaqiriqqacha yoshlarni tayyorlash fani uslubchisi vazifasida samarali mehnat qiladi.

Mahoratli pedagogni oʻz sohasining bilimdoni boʻlish barobarida kitob mutolaasiga boʻlgan muhabbati ham cheksizdir. Shu bois uning qalamiga mansub oʻtkir va xalqchil misralar oʻz muxlislarini topa boshlaydi. Ijodkorning qalamiga mansub ona vatan, tinchlik va baxtiyorlikni tarannum etuvchi sheʼrlari tuman va viloyat miqyosidagi mahalliy gazetalardan chop etilgan.

Ijodiy faoliyat bilan hamohanglik Xayrullo Turgʻunovga omad olib keladi. U 2003-yili “Vatanimni madh etaman” mavzusidagi respublika miqyosidagi “Ijodkor oʻqituvchi” koʻrik -tanlovida fahrli oʻrinlarning biriga sazovor boʻlgan. “Jaloliddin Manguberdi”, “Vatan xoinlariga”, “Shukr qilaman” sheʼriy dostonlar hakamlar hayʼatining alohida eʼtirofiga sazovor boʻladi.  

2012-yilda Xayrullo Turgʻunov “Adolat” SDPning Buvayda tuman Kengashi raisi lavozimida ish boshlaydi. Partiya fidoiysi partiya elektorati boʻlgan oʻqituvchi va shifokorlar bilan maktab va maktabgacha taʼlim tashkilotlarida, tibbiyot muassasalarida uchrashib, partiyaning “Partiya patronaji, “Sogʻlom turmush tarzi yoʻlida birlashaylik!”, “Birgalikda huquqiy madaniyat sari”, “Vatan kelajagi yoshlar qoʻlida” kabi qator loyihalari doirasida targʻibot tadbirlarini oʻtkazib keladi. Shuning bilan birga u asosiy eʼtiborini partiya saflarini shijoatli yoshlar bilan toʻldirishga qaratadi.

Fidoiy insonning saʼy- harakati tufayli tumanda bugungi kunda Adolat partiyasining nufuzi baland. Partiya aʼzolari soni 2400 nafarni tashkil qiladi. Boshlangʻich partiya tashkilotlari soni esa 20 dan ortib ketdi.

Xayrullo Turgʻunov – el qadrlagan inson. U 2004, 2014, 2020-yillarda tuman Kengash deputatligiga boʻlib oʻtgan saylovlarda eng koʻp ovoz toʻplab, tuman Kengashi deputatligiga saylanishga muvaffaq boʻladi. Bu albatta, saylovchilarning ishonchini oqlashga boʻlgan harakatlarining munosib javobidir. Biror fuqaro oʻz muammosini hal qilolmay qiynalganini koʻrgan odam borki, bir gapni aytadi.   “Siz Deputat Xayrullo akaga boring, albatta masala ijobiy hal boʻladi”, deyishadi.

- Partiya meni elga tanitdi, yuzlab odamlarning muammosini hal etib, ularni duo qilishlari uchun zamin yaratdi,-deydi xalq maorifi aʼlochisi, Oʻzbekiston Respublikasi mustaqilligining 25 yilligi koʻkrak nishoni sohibi Xayrullo Turgʻunov.- 4 nafar farzandlarim bor. Hammalari oliy maʼlumotli. Shunday tinch va osuda yurtda yashayotganligim bilan gʻururlanaman. Umrimning har lahzasini yosh avlodni ona vatanni sevishga, qadrlashga oʻrgatishga baxshida etayotganimdan baxtiyorman.

Faxriy pedagog, “Adolat” SDP Buvayda tuman Kengashi raisi Xayrullo Turgʻunovni 1-oktyabrʼ — Oʻqituvchi va murabbiylar kuni” bayrami munosabati bilan chin dildan muborakbod etamiz.

Gulchehra Ahmedova,

“Adolat” SDP Fargʻona viloyat Kengashi matbuot kotibi.