Endi bolalar zoʻravonlikning qurboni boʻlmaydi

Keyingi vaqtda respublikamizda Davlatimiz rahbari boshchiligida boshlangan islohotlar koʻplab sohalar qatori bolalar huquqlari va qonuniy manfaatlari himoyasi sohasida tub oʻzgarishlarni boshlab berdi. Jumladan, yangilangan Bosh qomusimizda bola huquqlari kafolatlariga alohida eʼtibor qaratildiki bu masalaning qanchalik dolzarb ekanligini koʻrsatadi. Qolaversa, amalga oshirilayotgan islohotlar bolalarni zoʻravonlikning barcha turlaridan himoya qilishga qaratilgan.

Aytish mumkinki, jamoatchilik muhokamasiga qoʻyilgan “Bolalarni zoʻravonlikning barcha shakllaridan himoya qilish toʻgʻrisida”gi qonun loyihasi bu borada yana bir dadil qadam boʻldi. “Adolat” SDP Andijon shahar kengashi tashabbusi bilan Andijon davlat universitetida tashkil etilgan davra suhbatida ayni shu xususida soʻz yuritildi.

Tadbirda soʻz olgan huquqshunos va ekspertlar taʼkidlaganidek, bolalarni har qanday turdagi zoʻravonliklardan himoya qilishni oiladan boshlash kerak. Qonun loyihasida koʻrsatilganidek zoʻravon ota-onadan farzandini olib qoʻyish, bolaga himoya orderi berish va individual himoya rejasini ishlab chiqish, taʼlim muassasalarida bolalar oʻrtasida zoʻrlik qilish va kamsitishga yoʻl qoʻymaslik dolzarb vazifa.

Moʻtabar Sodiqova, huquqshunos:

-Qonun loyihasini qoʻllab-quvvatlayman. Uni jamoatchilik orasida chuqur oʻrganish zarur. Ayrimlar ota-onaligini ustun qoʻyib oʻz farzandiga nisbatan zoʻravonlik qilishidan koʻz yumib boʻlmaydi. Bu ogʻriqli nuqtamiz. Yana bolalar bilan ishlovchi muassasalar xodimlarining masʼuliyatini ham oshirish maqsadga muvofiqdir. Menga eng maʼqul boʻlgani zoʻravonlikdan jabrlanuvchiga davlat himoyasini taqdim etuvchi himoya orderini berilishi.

Tadbir ishtirokchilari taʼlim muassasalarining bolalarni zoʻravonlikdan himoya qilish sohasidagi vakolatlari, taʼlim muassasalarida bolalarga nisbatan zoʻravonlikka yoʻl qoʻyilmasligi, jinsiy zoʻravonlik sodir etgan shaxsning huquqlarini cheklash va bu boradagi maʼlumotlarni maxfiyligiga qaratilgan moddalarni maʼqulladilar.

“Adolat” SDP Andijon viloyati kengashi

Matbuot xizmati.