Ezgu maqsadlar yoʻlida birlashamiz!

“Adolat” SDP Fargʻona viloyati Kengashi tomonidan Fargʻona davlat universitetining Tarix fakultetida “Boshlangʻich partiya tashkiloti faoliyatining tashkiliy, huquqiy mexanizmlarini takomillashtirish – “Adolat” SDP faoliyatida muhim omil” mavzusida maʼnaviy –maʼrifiy tadbir tashkil etildi.

Tadbirda partiyaning viloyat Kengashi raisi, “Shuhrat” medali sohibasi Shahnoza Gʻaniyeva oʻz maʼruzasida mamlakatimiz taraqqiyotida partiyalarning oʻrni va uning asosiy vazifalari haqida soʻz yuritar ekan, adolat sotsial demokratik partiyasining saylov oldi dasturida ilgari surilgan ustuvor maqsad va vazifalar haqida batafsil maʼlumot berdi. Jumladan, huquqiy demokratik davlat, ijtimoiy yoʻnaltirilgan bozor iqtisodiyotiga asoslangan kuchli adolatli fuqarolik jamiyatini barpo etish hamda Oʻzbekiston hududida yashayotgan barcha millat va elatlarning umumiy manfaatlariga mos keladigan, fuqarolarning qonun oldida tengligi, birdamligi, konstitutsiyaviy huquq va erkinliklari taʼminlangan, maʼnaviy jipslashgan jamiyatni taraqqiy topshirishda partiya safdoshlarining koʻpligi va birdamligi muhim ahamiyatga ega ekanligi eʼtirof etildi.Bu borada partiya faoliyatining asosiy boʻgʻini boʻlgan boshlangʻich partiya tashkilotlarining vazifalari yuzasidan tushunchalar berib oʻtdi.

- Boshlangʻich partiya tashkiloti fuqarolarning oʻzaro manfaatlari, umumiy qarashlari asosida hududiy, ishlab chiqarish muassasalarida birlashtirgan partiya tashkilotining boshlangʻich boʻgʻini sanaladi, — dedi viloyat Kengashi raisi Shahnoza Gʻaniyeva, — Sizlarning samarali faoliyatingiz partiya hayotida muhim ahamiyatga ega. Aʼzolar sonini ortishi, fikrlar xilma –xilligini, jamiyatdagi muammolarni hal etishga qaratilgan tashabbuskorlik , yangi maqsadlar va gʻoyalarni amalga oshirish uchun intilish partiyamizning xalq orasidagi obroʻsini oshiradi. Demakki, maqsadlar yoʻlidagi birdamlik- xalq farovonligi va vatan ravnaqi yoʻlida muhim ahamiyatga ega.

Uchrashuv davomida ishtirokchilarning savollariga partiya yetakchisi tomonidan tegishli javoblar berildi.