Faol yoshlarga ishonch bildirildi

Keyingi yillarda mamlakatimizda yoshlarga boʻlgan eʼtibor davlat siyosati darajasiga koʻtarilganligi bor haqiqat. Yangi Oʻzbekistonda  huquqiy savodxonligi yuqori, keng dunyoqarashga ega, yuqori intellektual salohiyatli yigit-qizlar ayni davrda amalga oshirilayotgan demokratik islohotlarda faol qatnashmoqda.

Aytish mumkinki, faol yoshlarni Oʻzbekiston Respublikasi Oliy Majlis Qonunchilik palatasi faoliyatida jamoatchilik asosida ishtirokini taʼminlanishi ularga boʻlgan yuksak ishonch demakdir. Shu bois, ayni davrda Yoshlar parlamenti aʼzoligiga oʻtkazilayotgan saylovlarda ishtirok etuvchilar safi kengayib bormoqda. “Adolat” SDP Andijon viloyat kengashida oʻtkazilgan saylovning ikkinchi bosqichida yuqoridagilar oʻz ifodasini topdi.

Ishtirokchilar saylov Nizomi shartlariga qatʼiy rioya qilingan holda belgilangan tartibda roʻyxatdan oʻtkazildi. Hujjat topshirganlarning orasida izlanuvchan va tashabbuskor navqiron avlod vakillarining koʻpligi quvonarli holdir. “Adolat” bilan hamnafas, siyosiy bilimi va huquqiy madaniyati, jamoatchilik ishlarida faolligi bilan yaqqol oʻzini namoyon etgan yigit-qizlarga partiyaning viloyat Kengashi tomonidan ishonch bildirilib, nomzodlarning hujjatlari partiya Siyosiy Kengashi Markaziy apparatida tuzilgan Respublika Tashkiliy qoʻmitasiga taqdim etildi.

“Adolat” SDP Andijon viloyat kengashi
Matbuot xizmati.