Faoliyat sarhisobi yangi marralarga boshladi

Oʻzbekiston “Adolat” SDP Andijon viloyat kengashining X plenumi boʻlib oʻtdi. Plenum kun tartibidan partiya viloyat kengashi ijroiya qoʻmitasining 2022-yildagi faoliyat va 2022-2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturidan kelib chiqadigan 2023-yildagi ustuvor vazifalar, xalq deputatlari Andijon viloyat kengashidagi Oʻzbekiston “Adolat” SDP deputatlik guruhining faoliyati yuzasidan hisoboti va 2023-yildagi faoliyati, partiya viloyat kengashining 2022-yilgi Ustav faoliyatini moliyalashtirish uchun ajratilgan davlat mablagʻlari va byudjetdan tashqari mablagʻlarining ijrosi kabi masalalar oʻrin oldi.

Shuningdek, partiya viloyat Kengashining “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy qonuni loyihasi boʻyicha joriy yilning 30-aprelʼ kuni oʻtkaziladigan Oʻzbekiston Respublikasi referendumidagi ishtiroki koʻrib chiqildi.

“Adolat” SDP Andijon viloyat kengashi raisi M. Madazimovning maʼruzasida taʼkidlanganidek, hisobot davrida partiyaning dasturiy vazifalarini amalga oshirishga qaratilgan loyihalarni amalga oshirish, partiya elektorati va aholining keng qatlami bilan yuzma-yuz muloqotlar tashkil qilib, ularni qiynayotgan, jamiyat rivojiga toʻsiq boʻlayotgan muammolarni bartaraf etishga alohida eʼtibor qaratildi. Partiya tayanchi boʻlgan deputatlik korpuslarining hamkorligi tizimli yoʻlga qoʻyildi. Natijada mahalliy kengash deputatlarining saylovchilar bilan ishlashda faolligi oshdi, hududlardagi koʻplab muammolar ularning aralashuvi bilan yechimini topdi.

Partiya aʼzolari safini kengaytirish, boshlangʻich partiya tashkilotlari faoliyatini kuchaytirish, kadrlar zaxirasini mustahkamlash, aʼzolik badallari tushumini tizimli yoʻlga qoʻyish, partiya faollarining siyosiy bilimlari va faolligini oshirish borasida ham sezilarli ishlar amalga oshirildi. Yil davomida partiya aʼzolari soni 3599 nafarga koʻpayib, umumiy aʼzolar soni 32 ming 460 nafarni, BPT soni esa 405 tani tashkil qildi.

Albatta yutuqlar quvonarli. Biroq faoliyatda kamchiliklar ham yoʻq emas. Jamoatchilik orasida partiyaviy tadbirlarni tashkil etish, safimizga yangi aʼzolarni jalb etish, OAVlar orqali targʻibot ishlarini olib borishda sustkashlikka yoʻl qoʻyayotgan tuman kengashlari oʻz faoliyatini tanqidiy koʻrib chiqishi zarur. Misol uchun Asaka va Marhamat tuman kengashlari yangi BPTlar tashkil etish va mahalliy kengash sessiyalariga masalalar olib kirishga loqaydlik bilan qaramoqda. Bu ana shu hududlarda partiyamizning reytingi tushib ketishiga olib keladi.

Tanqidiy ruhda oʻtgan plenum yakunida kun tartibidagi masalalar yuzasidan tegishli qarorlar qabul qilindi. Partiya yetakchilari oʻz faoliyatlarini jonlantirishga, respublikamizda oʻtkaziladigan referendumda faol ishtirok etishga kelishib oldilar.

“Adolat” SDP Andijon viloyat kengash
Matbuot xizmati.