Faoliyatdagi muhim vazifalar belgilab olindi

Bugun Oʻzbekiston “Adolat” SDP Qashqadaryo viloyat Kengashi faollarining kengaytirilgan yigʻilishi boʻlib oʻtdi. Unda partiya Siyosiy Kengashi raisi Bahrom Abduhalimov ishtirok etdi va viloyat partiya tashkilotlari oldida turgan vazifalar xususida maʼruza qildi.

- Shiddatkor zamonda partiya tashkilotlari faoliyati ham shunga monand boʻlishi kerak, — dedi Bahrom Abduhalimov. — Buning uchun albatta partiya tashkilotlari tomonidan targʻibot-tashviqot ishlarini toʻgʻri tashkil etish, odamlarni islohotlarga, ertangi kunga ishonchini yanada oshirish kerak. Prezidentimiz tomonidan olib borilayotgan keng koʻlamli bunyodkorlik ishlarida har bir qashqadaryoliklarning munosib ulushi boʻlishi lozim. Viloyat partiya tashkilotlari tomonidan shu kecha kunduzda olib borilayotgan ishlarni qoniqarli deb baholash mumkin.

Shuningdek partiyamiz rahbari, partiya tashkilotlarining kelgusidagi ishlari vazifalari xususida ham toʻxtaldi. BPTlar faoliyatini yanada jonlantirish yuzasidan qimmatli tavsiya va maslahatlarini berdi.

Partiya faollari bilan uchrashuvda viloyat Kengashi raisi Ruiddin Raupov soʻzga chiqdi.

- Viloyat partiya tashkiloti tarkibida bugungi kunda 45 ming nafardan ortiq faollari uyushgan, partiyaning hududiy va mahalliy Kengashlarida ham aʼzolarimiz soni ortib bormoqda, -dedi Ruiddin Raupov. — Partiyaning loyihalari boʻyicha olib borilayotgan targʻibot-tashviqot ishlari, “Adolat” qabulxonasiga kelgan murojaatlarning oʻz vaqtida bajarilishi yaxshi samara berayotgani, ayollar va yoshlar bandligi, matbuot xizmati, mahallalarda olib borilayotgan targʻibot ishlari xalqimizning bizga boʻlgan yuksak ishonchini ortib borishiga olib kelmoqda. Natijada esa viloyatdagi aʼzolarimiz soni bugungi kunga kelib 50 ming nafarga yetdi. Bundan keyin ham yoʻl qoʻyilgan kamchiliklarni bartaraf etib, yanada faol boʻlishga, xalq orasida oʻz ishlarimizning natijadorligini oshirishga harakat qilamiz.

Tadbirda muhokama etilgan masalalar yuzasidan tegishli vazifalar belgilab olindi.

Gulnoza Rajabova,
“Adolat” SDP viloyat Kengashi raisi oʻrinbosari.