Fargʻonada uch avlod uchrashuvi

Yangi Oʻzbekistonning yangi taraqqiyot manzillariga yangicha orzu maqsadlar bilan yoʻl oldik. Bugungi oʻzgarishlar, yangilanishlar, fan va taʼlim, ishlab chiqarish, madaniyat, inson qadr-qimmati, millatlar aro totuvlik, bagʻrikenglik tamoyillari asosida olib borilayotgan xayrli tashabbuslarning soni yildan yilga oshib bormoqda. Fargʻona shahrida “Jasmin” tantanalar uyida tashkillangan “Uch avlod uchrashuvi” yurt fidoiylarini yana bir makonda birlashtirdi.

Yangi Oʻzbekistonni bunyod etish uchun esa yoshlarimiz uchun nafaqat oʻtkir zehn va aql, zamonaviy bilimlar, balki keksa avlod vakillarining katta hayot maktabidan olgan saboqlari, milliy qadriyat va anʼanalarga hurmat, Vatanga boʻlgan muhabbat u sadoqat, shu bilan birga yurtimizdagi oʻzgarishlarga daxldorlik hissi bilan yashash ham talab etiladi. Uch avlod uchrashuvlari ana shunday kuchli ruhiy quvvat berayotgan maktab vazifasini oʻtab berayotganiga yana bir bor amin boʻldik.

Fargʻona shahar hokimligi tomonidan tadbir ishtirokchilari boʻlgan Oʻzbekiston Qahramonlari, faxriy ustoz va murabbiylar, mamlakat taraqqiyotiga, bugungi tinch, osuda, dorulomon kunlarga tamal toshi qoʻyilishida oʻzining munosib hissasini qoʻshgan yoshi ulugʻlar va oʻzining iqtidori va intilishi bilan yuksak natijalarni qoʻlga kiritgan yoshlarga hurmat va ehtirom koʻrsatilib, samimiy tilaklarga hamohang esdalik sovgʻalari ham topshirildi.

Butun umrimni ilm-u fan rivojiga bagʻishladim. Shogirdlarim yutuqlari, farzandlarim va nabiralarim erishgan natijalari meni yangi maqsadlar sari undayveradi, - deydi Fargʻona Davlat Universiteti professori Turgʻunoy Egamberdiyeva. – Shunday tinch va osoyishta yurtda yashayotganim meni va barchamizni baxtimiz. Biz shunday yurtda yashayotganligimiz bilan faxrlanamiz.

Tantanali tadbirda yurt fidoiylari safida “Adolat” SDP Fargʻona viloyat Kengashi raisi Shahnozaxon Gʻanieva ham ana shunday mukofot va eʼtiroflarga sazovor boʻldi.

“Adolat” SDP
Fargʻona viloyat kengashi
Matbuot xizmati.