Fargʻonadan gumanitar yordam joʻnatildi

Turkiyaning janubi-sharqiy viloyatlarida kuchli zilzila oqibatida roʻy bergan baxtsiz hodisa hech kimni befarq qoldirmadi. Halokat chindan ham fojiali boʻlib, qurbon boʻlgan insonlar soni ham oz emas. Hozirda amalga oshirilayotgan tezkor qidiruv ishlari tufayli koʻplab insonlar vayronalar ichidan olib chiqilib, ularga zarur yordamlar koʻrsatilmoqda. Mazkur holatga beparvo boʻlmagan borki, oʻzining koʻmagini, amaliy yordamini berishga harakat qilmoqda.

“Adolat” SDP Fargʻona viloyat Kengashi ham Xalq deputatlari Qoʻshtepa tuman Kengashi deputatlari va “Margʻilon saxovati” xayriya guruhi taʼsischisi A.Ahmadjonov koʻmagida zilziladan jabr koʻrgan turk qardoshlar uchun kerakli boʻlgan buyumlar bilan toʻla insonparvarlik yordamini tayyorlashdi.

-Partiyaning “Saxovat – benazir qadriyat” loyihasi doirasida koʻplab saxovatpesha insonlar imkon qadar kiyim-kechak, yotar-joy buyumlari, bolalar uchun zarur vositalarni keltirishdi. Xayriya tadbirida ayniqsa “Margʻilon saxovati” xayriya guruhi faollarining mehnati ulugʻ. Ular bor kuch va imkoniyatlarini ishga soldilar, – deydi partiya viloyat Kengashi v.b Sh.Egamov.

Hozirda saxovatpesha yurtdoshlarimiz koʻmagida ikkinchi gumanitar yordam furasi tayyorlanmoqda.

“Adolat” SDP Fargʻona viloyat Kengashi

Matbuot xizmati.