Yangiliklar 507
Farovon turmush va taraqqiyotimiz asosi
Yangi tahrirdagi Konstitutsiya loyihasida O‘zbekiston – huquqiy davlat, deb belgilanmoqda. Xususan, inson huquq va erkinliklarini ta’minlash davlatning oliy maqsadi, deya e’lon qilinar ekan, unda inson huquqlariga oid normalar 3 baravardan ortiqqa oshmoqda.
Qoraqalpog‘iston Respublikasi Ellikqal’a tumanida yangilanayotgan Konstitutsiya mazmun-mohiyatiga bag‘ishlab o‘tkazilgan tadbirda bu haqda ma’lum qilindi.
Unda Oliy Majlis Qonunchilik palatasi Spikeri o‘rinbosari Z.Ibragimova Asosiy qonunimizga kiritilayotgan o‘zgarishlar haqida yig‘ilganlarga ma’lumotlar berdi.
Spiker o‘rinbosari shuningdek, tuman tibbiyot birlashmasi, bir qator tashkilot va idoralarda ham bo‘lib yangilanayotgan Konstitutsiyaning mazmun-mohiyati aholiga tushuntirdi.
Qayd etilganidek, yangi tahrirdagi Konstiutsiyada insonning davlat organlari bilan o‘zaro munosabatlarda yuzaga keladigan qonunchilikdagi barcha ziddiyatlar va noaniqliklar inson foydasiga talqin etilishi belgilanmoqda.
Shuningdek, har kim o‘z huquq va erkinliklarini qonunda taqiqlanmagan barcha usullar bilan himoya qilishga haqliligi belgilanyapti. Ushbu qoidaning mazmun-mohiyati shundaki, fuqarolar o‘z buzilgan huquq va erkinliklarini, o‘zgalar huquqlarini buzmagan holda, mustaqil himoya qilish huquqiga ega.
So‘zga chiqqanlar Bosh qomusimizga muayyan o‘zgartirish va qo‘shimchalar kiritish hozirgi zamon talablaridan biri ekanligini, chunki dunyo shiddat bilan o‘zgarish va rivojlanishda davom etayotganligini qayd etdilar.
Bu o‘zgarishlar mamlakatni muvaffaqiyatlar sari yetaklashi, fuqarolarimiz huquqlarini himoya qilishga xizmat qilishini ta’kidladilar.
Fikringizni qoldiring