Farzandli talaba qizlar uchun kollejda bogʻcha tashkillandi

Qizlarning turmushga chiqish va taʼlim yoshi deyarli teng. Shu sababdanmi, oilali talaba qizlar juda qiyin ahvolga tushib qoladilar. Odatda, oʻzlashtirish koʻrsatkichlari tushib ketishi, taʼsirchan va asabiy boʻlishi, oilada ham oʻqishda ham “ikkichi”ga aylanib qolishi mumkin. Bunday vaziyatda ularni qoʻllab-quvvatlash juda zarur.

Аyni paytda koʻplab oliy taʼlim muassasalarida tatbiq etilayotgan tajriba Buvayda tibbiyot kollejida ham joriy etildi. Kollej direktori, Xalq deputatlari viloyat Kengashi deputati N.Jumaboev tomonidan yosh bolali talabalar uchun bir qator qulayliklar yaratildi. Oʻquv dargohi qoshida talaba farzandlari uchun xizmat koʻrsatadigan maktabgacha taʼlim guruhi tashkillandi.

– Yosh bolali talaba-qizlarning oʻquv jarayonidagi ahvoli, berilgan topshiriq va vazifalarni bajarishdagi holati boshqa oddiy talabalardan farq qiladi. Eng avvalo, farzandidan xavotir hissi ularni qiynaydi, – deydi N.Jumaboev. – Qizlarimizning yaxshi bilim olishlari, oʻz ustida ishlashlari uchun yaratilgan har qanday sharoit kelgusida kelajak avlod tarbiyasida boʻy koʻrsatadi. Bilimli, oʻz kasbini, oilasini sevuvchi, izlanuvchan yoshlarimiz bola tarbiyasida ham oʻziga xos yondashuvga ega boʻladi. Ularni qoʻllab-quvvatlashga qaratilgan saʼy harakatlar esa umid va maqsadlariga kuch beradi.

“Аdolat” SDP Fargʻona viloyat Kengashi

Matbuot xizmati.