Fraksiya faoliyati: Odil sudlovdan foydalanish imkoniyati yanada kengayadi

Oliy Majlis Qonunchilik palatasining navbatdagi majlisida “Davlat boji to‘g‘risida”gi O‘zbekiston Respublikasi Qonuniga ma’muriy sudlarga murojaat qilishda fuqarolarga yanada qulay sharoitlar yaratishga qaratilgan o‘zgartirish kiritish haqida”gi qonun loyihasi birinchi o‘qishda konseptual jihatdan ko‘rib chiqildi.

So‘nggi yillarda mamlakatimizda amalga oshirilayotgan sud-huquq islohotlari fuqarolarning odil sudlovga erishish imkoniyatlarini yanada kengaytirish, ularning huquqlari va erkinliklari hamda qonuniy manfaatlarining ishonchli himoyasini ta’minlash, shuningdek aholining sudlarga bo‘lgan ishonchini yanada mustahkamlash imkonini bermoqda.

Qonun loyihasi bilan fuqarolarga davlat boshqaruvi organlarining, ma’muriy-huquqiy faoliyatni amalga oshirishga vakolatli bo‘lgan boshqa organlarning, fuqarolar o‘zini o‘zi boshqarish organlarining, ular mansabdor shaxslarining qaror va harakatlari (harakatsizligi) ustidan ma’muriy sudlarga murojaat qilganda BHMning 70 foizi miqdorida davlat boji to‘lashi nazarda tutilmoqda.

Taklif etilayotgan normalar fuqarolarning huquqlari va qonuniy manfaatlari sud tartibida himoya qilinishini ta’minlashga, shuningdek odil sudlovdan foydalanish imkoniyatini yanada kengaytirishga xizmat qiladi.

Majlisda qonun loyihasi deputatlar tomonidan qabul qilindi.

Маnba: parliament.gov.uz