Fraksiyalarda Hukumatning hisoboti muhokama qilindi

2023 yil 3 avgust kuni Oliy Majlis Qonunchilik palatasidagi “Adolat” sotsial demokratik partiyasi, Xalq demokratik partiyasi hamda O‘zbekiston Ekologik partiyasi fraksiyalarining qo‘shma yig‘ilishi bo‘lib o‘tdi.

Unda 2022 – 2026 yillarga mo‘ljallangan Yangi O‘zbekistonning taraqqiyot strategiyasini “Insonga e’tibor va sifatli ta’lim yili”da amalga oshirishga oid davlat dasturining 2023 yil birinchi yarim yilligida bajarilishi yuzasidan Vazirlar Mahkamasining hisoboti eshitildi.

Qayd etilganidek, o‘tgan davrda aholining hayot darajasini yanada yuksaltirish, milliy iqtisodiyotni jadal rivojlantirish, yuqori o‘sish sur’atlarini ta’minlash, ta’lim sifatini oshirish, ekologik barqarorlikka erishish borasida tizimli ishlar amalga oshirilgan.

O‘z vaqtida ko‘rilgan chora-tadbirlar natijasida 2023 yilning I yarim yilligida yalpi ichki mahsulot o‘sishi o‘tgan yilning shu davriga nisbatan 5,6 foizni, shundan yalpi ichki mahsulot tarkibida sanoat – 5,6 foiz, xizmatlar – 6,4 foiz, qishloq, o‘rmon va baliqchilik – 3,8 foizni tashkil qilgan.

“Adolat” SDP fraksiyasi a’zolari tomonidan Davlat dasturining partiya saylovoldi dasturi bilan hamohang bo‘lgan inson huquqlari va erkinliklarini himoya qilish, xususan, advokatura instituti jozibadorligini oshirish, sohaga yosh kadrlarni jalb qilish bo‘yicha amalga oshirilayotgan ishlar alohida e’tirof etildi.

Shuningdek, Davlat dasturi doirasida boshlangan va amalga oshirilayotgan loyihalarni 2023 yilning qolgan davrida ham izchil davom ettirish, belgilangan vaziflarni amalga oshirishda sustkashlikka yo‘l qo‘ymaslik kerakligi qayd etib o‘tildi.

Jumladan, aholiga ko‘rsatilayotgan tibbiy xizmat sifatini oshirish maqsadida 76 ta oilaviy shifokor punkti, 20 ta oilaviy poliklinika hamda 505 ta mahalla tibbiyot punkti tashkil etilib, 1,8 mln. aholiga o‘z yashash joyida birlamchi tibbiy-sanitariya xizmati yo‘lga qo‘yilgan, 208 ta ko‘p tarmoqli tuman markaziy poliklinika hamda Toshkent shahridagi 70 ta oilaviy poliklinikada bolalar bo‘limlari tashkil etilgan.

Ta’kidlanganidek, Davlat dasturi doirasida barcha sohalar qatori atrof-muhitni muhofaza qilish, tabiiy resurslardan oqilona foydalanish va ekologik muammolarni hal etish masalalari bo‘yicha belgilangan bandlarning ijrosi yuzasidan bir qator ishlar amalga oshirilgan.

Xususan, maishiy chiqindilarni yig‘ishni 100 foizga, uni qayta ishlash darajasini 21 foizdan 50 foizga yetkazish maqsadida Osiyo taraqqiyot banki ishtirokida “Qattiq maishiy chiqindilarni barqaror boshqarish” loyihasi doirasida 156 ta chiqindi tashuvchi texnika xarid qilinib, 79 ta texnika hududlarga yetkazib berilgan.

Davlat dasturi doirasida joriy yilda atrof-muhit monitoringi doirasida 685 ta atmosfera havosi, tuproq va yer usti suv obyektlarning ifloslantiruvchi manbalaridan namunalar olish va ularni tahlil qilish belgilangan bo‘lib, bugungi kunda 542 ta obyektlarning 1568 ta manbalarida monitoring o‘tkazilgan.

Orol dengizining qurigan tubi va Orolbo‘yi (Qoraqalpog‘iston Respublikasi, Navoiy, Buxoro, Xorazm viloyatlari) hududida jami 195 ming gektar maydonda “yashil qoplama”lar barpo etilgan. Nukus shahri atrofida 5 km masofada 3590 dona qayrog‘och kabi iqlim sharoitga mos daraxtlar ko‘chatlari ekilgan.

Savol-javoblarga boy bo‘lgan yig‘ilishda fraksiyalar a’zolari tomonidan bildirilgan taklif va tavsiflari asosida Davlat dasturining ijrosi yuzasidan Vazirlar Mahkamasining hisoboti ma’qullandi.