Fuqaro murojaati ijobiy hal etildi

Mamlakatimiz rahbarining “Oʻzbekiston Respublikasi davlat mustaqilligining oʻttiz ikki yillik bayramiga tayyorgarlik koʻrish va uni yuqori saviyada oʻtkazish toʻgʻrisida”gi qarorining ijrosini taʼminlash maqsadida “Adolat” SDP Fargʻona viloyat Kengashi aniq rejalarni belgilab oldi.

“Yangi hayot uchun, Yangi Oʻzbekiston uchun!” degan bosh gʻoyani oʻzida mujassam etgan shior xalqimiz koʻngliga shukronalik hislari bilan mujassam boʻlishi partiyadan saylangan deputatlarimizning ham ezgu maqsadiga aylandi.  

Xalq ishongan va suyangan deputatlar bor ekan, taqdir sinovlari tufayli koʻmakka muhtoj boʻlib qolgan insonlar yuki yerda qolmasligiga yana bir bor bugun iqror boʻldik. Xalq deputatlari Quvasoy shahar Kengashi deputati M.Mexmonov “Kokilon” MFYda yashovchi Odiljon Sattorovning murojaatida koʻrsatilgan muammolarni shaxsan xonadoniga borib oʻrgandi.

Haqiqatdan ham, oilada imkoniyati cheklangan Sattorovlar qaynonasi va qaynsinglisi bilan qurilishi tugallanmagan uyda istiqomat qilib kelishar ekan. Kam taʼminlangan oila vakillari tikuvchilik hunarini egallagan boʻlsa-da, tikuv mashinasini xarid qilish ular uchun orzu edi. Axir, qoʻl bilan berganga qush toʻymas. Bu istaklar Quvasoyliklarning yaqin suyanchigʻiga aylanib ulgurgan deputat Muhsinjon Mehmonovga maʼqul keldi. Shu kunning oʻzida oila ayollari uchun eng soʻnggi rusumdagi tikuv mashinasini hadya qildi.  

Sattorovlarning uy qurilishi uchun esa, yordam tariqasida deputat tomonidan besh million soʻm mablagʻ ajratildi. Bu eʼtibor va koʻmak oila ahlini qalbiga quvonch bagʻishladi. Inson qadri ulugʻlangan yurtda saxovatli insonlar va fidoyi deputatlar borligidan sevinib, yurtga tinchlik, elga farovonlik tilab duolar qildilar.

“Adolat” SDP

 Fargʻona viloyat Kengashi Matbuot xizmati.