Fuqarolar hayotini tubdan oʻzgartirishga xizmat qiluvchi hayotiy hujjat

Davlatimiz rahbarining “Oʻzbekiston – 2030” strategiyasi toʻgʻrisida”gi farmoni hamda “Oʻzbekis­ton – 2030” strategiyasini 2023-yilda oʻz vaqtida va sifatli amalga oshirish chora-tadbirlari toʻgʻrisida”gi qarori Yangi Oʻzbekiston sharoitida amalga oshirilayotgan keng koʻlamli islohot va oʻzgarishlarni izchil davom ettirish, soha va yoʻnalishlarni yanada rivoj­lantirishga qaratilgani bilan ahamiyatlidir.

Davlatimiz rahbari bu haqda soʻz yuritar ekan, “Xalq manfaatini taʼminlash, inson qadrini ulugʻlashga qaratilgan harakatlarni davom ettirish maqsadida “Oʻzbekiston – 2030” strategiyasini ishlab chiqdik. Mazkur hujjatlarning qabul qilinishini keng jamoatchilik juda katta xushnudlik bilan qarshi oldi. Boisi, “Oʻzbekis­ton – 2030” strategiyasi loyi­hasi muhokamasida xalqimiz tomonidan bildirilgan har bir fikr, taklif qunt bilan oʻrganildi. Uning loyihasini muhokamaga qoʻyganimizda 1 milliondan koʻp takliflar kelib tushdi. Bu nimadan dalolat? Xalqimiz befarq emas. Yoʻnalishlarimizni, kamchiliklarimizni koʻrsatib beryapti. Bu biz uchun “yoʻl xaritasi”. Davlatga eng katta hakam – xalq,” deb taʼkidlab oʻtgani ham “Oʻzbekiston – 2030” strategiyasi tom maʼnoda xalq strategiyasi ekanining yaqqol isbotidir..

Strategiya beshta ustuvor yoʻnalish boʻyicha 100 ta muhim maqsadni oʻz ichiga qamrab olgani bilan eʼtiborga molik. Bu mamlakatda islohotlar samaradorligini keskin oshirish, barqaror iqtisodiy oʻsish orqali daromadi oʻrtachadan yuqori boʻlgan davlatlar qatoridan oʻrin olish, xalq xizmatidagi adolatli va zamonaviy davlatni barpo etishdek buyuk maqsadlarga xizmat qiladi. 

Jumladan, tibbiy yordamga muhtoj aholining 70 foiz murojaatlarini birlamchi boʻgʻinning oʻzida hal etish, kambagʻallikni ikki barobarga kamaytirish, maktabgacha taʼlim bilan qamrov darajasini 100 foizga yetkazish, mahalla byudjeti tizimini toʻliq ishga tushirish, davlat xizmatlarini toʻliq elektron shakl­ga oʻtkazish, suv ishlatish samaradorligini 25 foizga oshirish, respublika hududining yashillik darajasini 30 foizga yetkazish kabi qator maqsadli koʻrsatkichlar bizni farovonlik sari yetaklaydi.

Bundan tashqari, Strategiyadan mamlakatda kambagʻallik darajasini qisqartirish ham oʻrin olgan boʻlib, 2026-yilga qadar kambagʻallikni 2022-yilga nisbatan 2 barobarga, 2030-yilga qadar esa keskin qisqartirish hamda kambagʻallikka tushish xavfi mavjud 4,5 million aholi daromadini oshirish kabi muhim vazifalar belgilab olinmoqda. Buning uchun, albatta, tizimli ishlar – xonadonbay, fuqarobay ishlar tashkil etiladi. Kasb-hunarga oʻqitish va ish bilan taʼminlashga alohida eʼtibor qaratiladi. Pirovardida, partiyamizning elektorati boʻlgan fuqarolarning yashash sharoiti oʻzgaradi. Hayotda oʻz oʻrni va kelajagini belgilab beruvchi muhim islohotlardan rozi boʻladi. Muhimi, inson qadri degan shior amalda oʻz isbotini topadi.

Taʼlim tizimining barcha bos­qichlarida bosh­langan islohotlar jadallik bilan davom ettirilishi maqsad qilinmoqda. 2023-2030-yillarda bolalarni maktabgacha taʼlim va tayyorlov guruhlari bilan qamrab olish darajasi 100 foizga yetkaziladi. Buning uchun 2 mingta yangi bogʻcha bun­yod etiladi. Maktabgacha taʼlim tashkilotlari 100 foiz toza ichimlik suvi va zamonaviy sanitariya-gigiyena infratuzilmasi bilan taʼminlanadi. Shuningdek, umumiy oʻrta taʼlim tizimida “Taʼlim uchun qulay muhit” dasturi amalga oshiriladi. Natijada, 2023/2024 oʻquv yildan boshlab har yili 500 ming yangi quvvatlar tashkil etilib, oʻquv oʻrinlari soni 7,5 millionga yetkazildi. 2,5 million oʻquvchi oʻrniga ega maktablar qurishga 8 milliard dollar ajratiladi.

Ushbu jarayonlarda oʻquvchi-yoshlarimizning oliy taʼlim olishga boʻlgan intilishlarini ham toʻlaqonli qamrab olishga alohida eʼtibor qaratiladi. Yoshlarni oliy taʼlim bilan qamrab olish darajasi kamida 50 foizga yetkazilib, davlat granti asosidagi qabul parametrlari 2 barobarga oshiriladi. “Top-500”ga kiradigan xorijiy universitetlar bilan hamkorlikda kamida 50 ta qoʻshma taʼlim dasturi va “ikki dip­lomli tizim” joriy qilinadi. 5 ta oliy taʼlim muassasasi milliy tadqiqot oliygohlariga aylantirilib, qoʻshimcha 120 ming oʻrinli oʻquv binolari hamda 150 ming oʻrinli talabalar turar joylari quriladi.

Bir soʻz bilan aytganda, “Oʻzbekis­ton — 2030” strategiyasi nafaqat mamlakatimizning kelgusi yetti yillik taraqqiyotini, shu bilan birga, uning uzoq yillik rivojlanish strategiya­sini belgilab beruvchi muhim hujjatdir. Unda belgilangan maqsadlarning ijrosi oʻz vaqtida taʼminlanishi davlat va jamiyatning har tomonlama jadal rivojlanishida, hayotning barcha sohalarini liberallashtirishda muhim omil boʻlib xizmat qiladi.

Biz, xalq vakillari ham ushbu yetti yilga moʻljallangan strategiyamizning maqsadlarini aniq va puxta bajarilishida faol boʻlishimiz zarur, deb hisoblayman. Buning uchun oʻz saylovchilarimizga ushbu muhim tarixiy hujjatning mazmun-mohiyatini tushuntirib borishimiz, belgilangan vazifalar ijrosida jamoatchilik nazoratini oʻrnatishimiz lozim. Vatan taqdiri, kelajagiga befarq boʻlmasak, yurtimizda amalga oshirilayotgan keng koʻlamli islohotlarga hissamizni qoʻshsak, shubhasiz, oʻzimiz orzu qilgan Yangi Oʻzbekistonni barpo etamiz.

Maqsud Hamidov, 

 “Adolat” SDP Buxoro viloyat kengashi raisi