Fuqarolar murojaati deputat nigohida

Oliy Majlis Qonunchilik palatasi deputati Abdugʻani Umirovning Nishon tumanidagi saylovchilari bilan uchrashuvida aholini qiynab kelayotgan bir qator muammolarga yechim izlandi. Xususan, Yangiobod MFY fuqarolari bilan yuzma-yuz muloqotda Nargiza Norqobilova jinoyat ishlari boʻyicha Nishon tuman sudi qaroridan norozi ekanligi va ushbu masalada yordam berishini iltimos qildi. Uning murojaati asosida deputat oʻrganishlar olib bordi va Nargiza Norqobilovaning murojaati Oliy Sudda koʻrilishi kerak degan xulosaga kelindi. Shu tufayli deputat aralashgach fuqaroning murojaati Oliy Sudda koʻriladigan boʻldi.

Fuqaro Nodira Qoʻldosheva esa hozirga qadar Rossiya bilan Ukrainaning chegarasida joylashgan tibbiyot oliygohida taʼlim olib kelgan. Bugun esa u hududlarda notinchlik hukm surayotganligi sababli Oʻzbekistondagi oliygohlarga oʻqishini koʻchirib berishlarini soʻrab deputatga yuzlandi. Abdugʻani Umirov darhol Oliy taʼlim vazirligiga xat bilan chiqib Nodira Qoʻldoshevaning muammosini hal qilib berdi. U ayni paytda Qarshi davlat universitetining xorijiy tillar fakultetida oʻqishini davom ettirmoqda.

Nodir Isomov,

Oliy Majlis Qonunchilik palatasi deputati yordamchisi.