Fuqarolar tibbiy yordamning kafolatlangan hajmini qonunda belgilangan tartibda davlat hisobidan oladi

Andijon viloyat qon quyish markazida ham Oliy Majlis Qonunchilik palatasi deputati Mavluda Adhamjonova ishtirokida ana shunday tadbir boʻlib oʻtdi.

Qayd etilganidek, fuqarolarga tibbiy yordamning kafolatlangan hajmini qonunda belgilangan tartibda va davlat hisobidan koʻrsatilishi aholi salomatligi uchun muhim ijtimoiy koʻmak hisoblanadi.

Hozirda aholi uchun tibbiy yordamning kafolatlangan bepul hajmi doirasiga shoshilinch tibbiy yordam, bir qator yuqumli kasalliklar boʻyicha birlamchi tibbiy-sanitariya yordami, ijtimoiy ahamiyatga ega kasalliklar va xavfli kasalliklar boʻyicha ixtisoslashtirilgan tibbiy yordam koʻrsatish kiradi.

Davlat hisobidan kafolatlangan tibbiy xizmatni rivojlantirish maqsadida 2021 yildan boshlab, birlamchi boʻgʻinda aholini 66 turdagi, 2022 yilda 120 turdagi dori vositalari bilan bepul taʼminlash yoʻlga qoʻyildi. Ixtisoslashgan markazlarda bepul davolanadigan kasalliklar roʻyxati shakllantirilib, tibbiy yordam uchun yoʻllanma elektron navbat asosida berilmoqda. Eng muhimi, bu tizimga asosan, mablagʻlar shifoxonaga emas, balki aniq bemorga ajratilmoqda.

—Xususan, birgina 2022 yilning oʻzida tibbiyot sohasiga byudjetdan 29 trillion soʻm yoʻnaltirildi, bu mablagʻ 2016 yilga nisbatan 5 barobar koʻpdir, — deydi deputat Mavluda Adhamjonova. —Oʻtgan besh yilda shifoxonalar va tez tibbiy yordam punktlarini dori-darmon, tibbiyot buyumlari bilan taʼminlash uchun mablagʻlar 12 barobar koʻpaytirildi. Bularning barchasi yurtimizda istiqomat qilayotgan fuqarolarning sogʻligʻini saqlashga qaratilgan amaliy choralardir.

Yangi tahrirdagi Konstitutsiyada Oʻzbekiston Respublikasi fuqarolari tibbiy yordamning kafolatlangan hajmini qonunda belgilangan tartibda davlat hisobidan olishga haqli ekanligi belgilab qoʻyilayotgani eʼtiborga molikdir.

Tadbir davomida soʻzga chiqqanlar mustaqillik davrining soʻnggi olti yillikdagi oʻzgarish va yuksalishlar haqida gapirdi. Bunga asos tariqasida viloyatda amalga oshirilgan ishlar, islohotlar eʼtirof etildi.