Gender tenglikda huquqiy madaniyat asosiy mezon

Maʼlumki, xotin-qizlarning jamiyatdagi faolligini oshirish, huquqiy madaniyatini yuksaltirish va himoyalash “Adolat” SDPning asosiy maqsadlaridan biri. Ayni shu maqsadga qaratilgan partiyaning “Bir adolatchi – yuz ayolga himoyachi” loyihasi doirasida qator tadbirlarning oʻtkazilishi bu oʻz-oʻzidan xotin-qizlarni partiyaga boʻlgan ishonchini oshiryapti.

“Adolat” SDP Koson tumani Kengashi tomonidan “Gubalak” MFY da “Yangi Oʻzbekistonda gender tenglik masalalariga yangicha yondashuv” mavzusida uchrashuv tashkil etildi. Unda ishtirok etgan mahalla xotin-qizlariga mutasaddilar tomonidan huquqiy maslahatlar berildi.

Partiya faollari va deputatlar hamkorlikda mahalladagi xonadonlarda boʻlib, fuqarolarning yashash sharoiti bilan yaqindan tanishdilar, muammolarga yechim topishga harakat qildilar. Oʻrganishlar davomida 28 nafar xotin-qizlar ishsiz ekanligi aniqlandi. Shularning 6 nafariga tijorat banklaridan kredit olishda koʻmaklashildi. 10 nafar ayollar esa kasanachilik ishlariga jalb qilindi. 12 nafari esa tuman obodonlashtirish boʻlimiga ishga joylashtirildi.

Tadbirda soʻz olgan tuman Kengashi raisi Hamza Oʻrinov shular xususida soʻz yuritdi. Shundan soʻng bugungi kunda Oʻzbekistonda gender tenglik masalalariga yangicha yondashuv haqida xalq deputatlari viloyat Kengashi deputati, “Ayollar qanoti” faoli Mavjuda Jumayeva maʼruza qildi.

— Dunyo tajribasiga koʻra, gender tenglik davrida xotin-qizlarni har tomonlama rivojlantirishga qaratilgan aniq rejali ishlarni amalga oshirish juda muhim. Shu nuqtai nazardan, Oʻzbekistonda ham xotin-qizlarning sifatli taʼlim olish huquqini taʼminlashga katta eʼtibor qaratilmoqda,- dedi xalq deputatlari viloyat Kengashi deputati Mavjuda Jumayeva. — Ayniqsa, qizlar tarbiyasi, ularni mustaqil hayotga tayyorlash, zamonaviy bilim va hunarlarni egallashi, ish joyiga ega boʻlishi, jamiyatda munosib oʻrnini topishiga alohida ahamiyat berilmoqda. Oʻtgan yildan boshlab ijtimoiy himoyaga muhtoj qizlarning bilim olish imkoniyatlari yanada kengaytirilib, oliy taʼlim muassasalariga 4 foizli davlat grantlari ajratilgani tufayli qizlarimiz davlat granti asosida oʻqishga qabul qilinayotganligi bu fikrimizni tasdiqlaydi.

Gender strategiyasi doirasida gender tenglik tushunchasi jamiyat hayoti va faoliyatining barcha sohalarida, shu jumladan siyosat, iqtisodiyot, huquq, madaniyat, taʼlim, ilm-fan, sport munosabatlarida xotin-qizlar va erkaklarning huquq hamda imkoniyatlarining tengligini anglatadi.

Tadbirda ishtirok etgan xotin-qizlar oʻzlarini qiziqtirgan gender tenglik masalalariga doir savollariga mutaxassislardan tegishlicha javoblar olishdi. Uchrashuv xotin-qizlarni qiynab kelayotgan koʻplab muammolarga yechim topishda ahamiyatli boʻldi.

Lobar Abidova,
Xalq deputatlari Koson tumani Kengashi deputati.