Gullab-yashnayotgan Soʻx

Oʻzbekiston Respublikasining eng chekka hududi hisoblanmish Soʻx tumanida ham keng koʻlamli bunyodkorlik ishlari amalga oshirilib, tumanimiz shaharlardan kam boʻlmagan darajada koʻrkam qiyofa kasb etmoqda.

Soʻx — gʻoyat xushmanzara maskan. Baland togʻlar, tiniq buloqlar, joʻshqin soylar, yashil alanga kabi koʻkka talpingan archalar… Tumanning eng katta boyligi bu – uning mehnatkash, mehmondoʻst va samimiy odamlaridir.

Birgina men saylagan saylov okrugi hududidagi Hazrati Ali mahalla fuqarolar yigʻinida byudjet mablagʻlari hisobidan 7 milliard soʻm mablagʻ evaziga imkoniyati cheklangan soʻxlik bolajonlar uchun muhtasham bogʻchaning bunyod etilishi, Hazrati Ali mahallamizda yashovchi aholining xavfsizligini taʼminlash uchun 6 milliard soʻm mablagʻ sarflanib, sel oqibatlarini bartaraf etish dambasining qurilishi, aholi turmush sharoitini yaxshilash maqsadida 5km ichki yoʻllarimizni asfalt qilinishi hamda 3 km masofaga ichimlik suv quvuri tortilib, 80 ga yaqin xonadonlarimizga obi -hayot keltirilishi yurtboshimizning, hukumatimiz va viloyat rahbarlarining Soʻx tumani aholisiga boʻlgan yuksak eʼtibor natijasidir.

“Yangi hayot uchun, Yangi Oʻzbekiston uchun!” degan shiori ostida mahallamizdagi sayllarda, tadbirlarda, davra suhbatlarida aholimiz shukronalik bilan faxrlanib, koʻtarinki ovoz bilan zikr qilishlari qalblarga koʻtarinki ruh baxsh etmoqda.

Darhaqiqat, Oʻzbekiston inson qadri ulugʻlangan yurt! Biz Soʻxliklar uchun Mustaqillik, bu yilda bir marta, faqat mustaqillik bayramida emas, har kuni, har lahza fikr yuritiladigan, har dam shukr qilinadigan, qadri, sharafi, bardavomligi koʻz qorachigʻidek asrab-avaylanadigan bebaho neʼmatdir. Uning sharofati bilan ijtimoiy, maʼnaviy va diniy qadriyatlarning qaytadan tiklanishi va rivojlanishi uchun keng yoʻl ochildi. Mustaqillik bizga oʻzligimizni, qadriyatlarimizni, maʼnaviy xazinalarimizni qaytardi. Mustaqillik bizga din-u diyonatimizni qaytardi.

 Fursatdan foydalanib mustaqilligimizning oʻttiz ikki yillik toʻyi munosabati bilan butun vatandoshlarimizni muborakbod etaman.

                                Subhonali Nishonov,

                              Soʻx tuman Kengashi deputati.