Hamjihatlik – ezgu qadriyat

Xabaringiz bor, mintaqamizga, shuningdek, yurtimizga kirib kelgan anomal sovuq harorati natijasida bugun barchamiz sinovli kunlarni boshimizdan kechirmoqdamiz.

Ob-havoning keskin sovib ketishi va qalin qor yogʻishi tufayli joylarda energiya taʼminotida yuzaga kelayotgan noqulayliklar, koʻchalardagi transport vositalari harakatida kuzatilayotgan ayrim qiyinchiliklar fuqarolarimizni oʻqish va ish faoliyatiga jiddiy taʼsir etmoqda.

Albatta, hukumatimiz tomonidan ushbu holatni yengillashtirish va yuzaga kelgan qiyinchiliklarni yumshatish maqsadida zarur chora-tadbirlar amalga oshirilmoqda. Bu borada Toshkent shahar hokimligi tomonidan muhtoj aholi qatlami, kam taʼminlangan oilalar, Uy-joy kommunal xizmat koʻrsatish sohasi, Obodonlashtirish boshqarmasi hamda Yoʻl harakati xavfsizligi xodimlariga shahardagi toʻyxonalarda bepul osh tarqatishni yoʻlga qoʻyilganligi eʼtirofga loyiqdir. 

Oʻz oʻrnida bizning Oʻzbekiston “Adolat” sotsial-demokratik partiyasining faollari, deputatlarimiz ham mazkur ezgu ishga bosh qoʻshib, anomal sovuq sharoitlarida fidoiylik bilan oʻzining kasbiy faoliyatini olib borayotgan soha xodimlariga va ularga beminnat koʻmaklashib, jonbozlik koʻrsatayotgan yurtdoshlarimizga, shuningdek, ijtimoiy himoyaga muhtoj, imkoniyati cheklangan insonlari bor xonadonlarga issiq oziq-ovqat va kiyim-bosh tarqatishga faollik koʻrsatmoqdalar.

Yurtimiz tarixiga nazar tashlasak, ajdodlarimiz bu kabi sinovli damlarda doimo yelkama-yelka turib, bir-birini qoʻllab-quvvatlagan holda xalqimiz boshiga kelgan qator qiyinchiliklarni yengib oʻtganlar.

Shu bois, Biz, “adolatchilar” bugungi xayrli tadbirlarda faol ishtirok etayotgan barcha fidoiy va insonparvar fuqarolarimizni qoʻllab-quvvatlagan holda yurtdoshlarimizni ushbu sinovli kunlarda hamjihat boʻlib, oʻzaro birdamlikda mavjud muammolarni bartaraf etishga chaqiramiz!

Oʻzbekiston “Adolat” SDP

Matbuot xizmati