Hamjihatlikda mehnat qilamiz

Yaqinda boʻlib oʻtgan ikkinchi chaqiriq saylovlarida Oliy Majlis Qonunchilik palatasi huzuridagi Yoshlar parlamentiga “Adolat” sotsial-demokratik partiyasidan nomzodim koʻrsatilib, 66-Nurobod saylov okrugidan saylandim.

Mazkur institut 2020-yilda Parlamentning har ikkala palatasi huzurida tashkil qilindi hamda birinchi chaqiriq a’zolari belgilangan tartibda saylandi. Yoshlar parlamenti instituti borasida koʻproq bilib olish maqsadida ochiq axborot resurslari va internet manbalarini oʻrganish jarayonida xorijiy davlatlar tajribalariga ham duch keldim.

Xususan, bu kabi tuzilmalar AQShda 1936-yilda (https://en.wikipedia.org/wiki/YMCA_Youth_and_Government), Avstraliyada 1963-yilda (https://en.wikipedia.org/wiki/YMCA_Youth_Parliament), Buyuk Britaniyada 1998-yilda (https://en.wikipedia.org/wiki/UK_Youth_Parliament), Malayziyada  2015-yilda (https://en.wikipedia.org/wiki/Youth_Parliament_of_Malaysia), Hindistonda 2016-yilda (https://en.wikipedia.org/wiki/Youth_Parliament_Program) tashkil topgan (bu yerda ba’zilari keltirildi). Aytish lozimki, har bir davlatning oʻziga xos tajribasi va tutumidan kelib chiqqan holda, biz shartli ravishda Yoshlar parlamenti deb ataydigan tuzilmalari ham oʻziga xos xususiyatlarga ega. Shunday boʻlsa-da, barchasi uchun umumiy boʻlgan jihatlar – yoshlarning parlament hayotiga qiziqishini oshirish, yoshlar muammolarini olib chiqish, takliflarini ilgari surish, jamiyatda yoshlarni faol siyosiy qatlamga aylantirish hisoblanadi.

Oʻzbekistonda ham Parlament quyi palatasi huzurida tashkil etilgan Yoshlar parlamentining asosiy maqsadi etib yoshlarni qo‘llab-quvvatlash, ularning huquqiy ongi va savodxonligini oshirish, jamiyatda yoshlarni siyosiy faol qatlamga aylantirish hamda ularning siyosiy-huquqiy bilim va ko‘nikmalarini amalda boyitish, qonunchilik va qonun ijodkorligi jarayoniga yoshlarni jalb qilish va qabul qilinayotgan qonunlarni yoshlar orasida keng targ‘ib qilish orqali ularning parlament hayotiga daxldorligini oshirish belgilangan.

Yoshlar parlamentiga saylangan barcha a’zolarni samimiy tabriklayman, oldimizga qo‘yilgan maqsadlarga erishish yo‘lida sidqidildan, hamjihatlikda mehnat qilamiz degan umiddaman.

Dilnur A’zamov,

“Yuksalish” umummilliy harakati Samarqand viloyat bo’linmasi bosh mutaxassisi, Oʻzbekiston Respublikasi Oliy Majlisi Qonunchilik palatasi huzuridagi “Yoshlar parlamenti” aʼzosi.