Har bir ayol himoyada

“Adolat” SDP Andijon viloyat kengashi aʼzolarining 19 ming nafarini xotin-qizlar tashkil etadi. Jamoatchilik bilan ishlash, saylovoldi dasturimizda belgilangan vazifalar ijrosini taʼminlash, partiya loyihalarini amalga oshirish va faoliyatini jonlantirishda ularning oʻrni katta.

Shu oʻrinda viloyatda keyingi vaqtda “Adolatchi ayollar bong uradi” loyihasi doirasida sezilarli ishlar amalga oshirilayotganini taʼkidlash lozim. Loyiha doirasida partiya viloyat kengashi qoshida tashkil etilgan “Faol adolatchi ayollar” klubi aʼzolari hududlardagi muammolarni oʻrganish barobarida xotin-qizlar hayoti bilan bogʻliq muammolarning yechimini topishga eʼtibor qaratmoqda. Jumladan, ularning yollanma mehnatga jalb etilishini oldini olish va bandligini taʼminlashda MFY faollari va hamkor tashkilotlar bilan birgalikda ish olib borilmoqda.

Yil boshida 170 nafar huquqshunos va siyosatchi xotin-qizlar ayni shu maqsadga qaratilgan chora-tadbirlar asosida hududlar kesimida ish boshladi. Bunda vaqtincha ishsiz xotin-qizlarning bandligini taʼminlash, joylardagi norasmiy mehnat bozorlariga chek qoʻyish va xorijiy davlatlarga ishlash maqsadida ketishni oldini olish asosiy maqsad qilib olindi.

Nasiba Toʻychiyeva, xalq deputatlari Andijon viloyati kengashi deputati:

-Biz uchun ayollarimizning begonasi yoʻq. Ayniqsa, ishsiz xotin-qizlarni ijtimoiy himoyalash asosiy vazifamiz. Chunki oilaning baxti va farovonligi ayol bilan. Bu borada ularning huquqiy madaniyatini yuksaltirish doimiy ishimizga aylangan. Deputatlarimiz oʻz saylov hududlarida oʻrganishlar natijasida joriy yilning oʻtgan davrida 350 nafardan ortiq xotin-qizlarning bandligini taʼminlashga erishdi. Bu shuncha oilaning tinchligi, farovonligi degani.

Maʼlumotlar quvonarli. Ayniqsa, Andijon shahrida “adolatchi ayollar” tomonidan olib borilayotgan ishlar eʼtiborga loyiq. 1996-yilda tugʻilgan fuqaro Nilufar Xudoynazarova partiyadoshlarimiz aralashuvi bilan   Andijon shahar markaziy poliklinikasiga ishga joylashtirilgani, 2001-yilda tugʻilgan fuqaro Zulfiya Abdurahmonova Andijon shahridagi “Bonu” xususiy korxonasida bandligi taʼminlangani quvonarli.

Yuqoridagi kabi misollarni koʻp keltirish mumkin. “Ayollar daftari” va “Yoshlar daftari”dan chiqarilib, jamiyatning faol aʼzosiga aylanayotganlar “Adolat” SDP safidan joy olmoqda. Asosiysi, andijonlik “adolatchi-ayollar” har sohada tashabbuskor. Shu sabab partiyamizga xayrixohlar soni ortib bormoqda.

“Adolat” SDP Andijon viloyat kengashi

Matbuot xizmati.