Har bir murojaat ijobiy yechim topmoqda

“Adolat” SDP Bogʻot tuman kengashi deputatlik guruhi aʼzolarining saʼy-harakatlari bilan saylovchilarni koʻpdan qiynab kelayotgan muammolar hamjihatlikda bartaraf etilishiga erishilmoqda. 

Jumladan, deputatlik guruhi rahbari Qahramon Rahimov tomonidan “Nurafshon” shaharchasida joylashgan “Ezgulik” koʻchasi hududiga oʻrnatilgan elektr simyogʻochning eskirib, foydalanish talab­lariga javob bermaydigan holga kelib qolgani, bundan mahalla aholisi, yoʻlovchilar xavotirga tushayotgani toʻgʻrisidagi murojaat eʼtiborga olindi va muammo ijobiy hal etildi.  

Tumandagi “Nurafshon” shaharchasi “Nurdiyor” koʻchasida 1 kilometr uzunlikdagi yoʻl taʼmirtalab ahvolga kelib qolganligi sababli deputatlik guruhi rahbarining aralashuvi bilan asfalt yotqizish ishlari amalga oshirildi. 

Deputatlik guruhi aʼzosi Qadamboy Xoʻjaqov koʻmagi bilan 1-guruh nogironi Sanʼat Jumaniyozovning murojaati qanoatlantirilib, charm tikish mashinasi olishi uchun 3,5 million soʻm mab­lagʻ ajratilishiga erishildi.

Deputatlik guruhi aʼzosi Otajon Matniyozov yoshlarni har tomonlama qoʻllab-quvvatlash, ijtimoiy faolligini oshirish, jamiyatda oʻz oʻrnini topishlari uchun ularning qiziqish va istaklariga qarab amaliy yordam berish maqsadida “Navbahor” mahallasida uchrashuv oʻtkazdi. Uchrashuvda “Nav­bahor” MFYdan 7 nafar, “Yuksalish” MFYdan 2 nafar yoshlar tuman kengashi deputatiga oʻzlarining soʻrov va takliflarini bildirdilar.

Murojaatchi yoshlardan Mahfuza Safarovaning tikuv mashina soʻrab qilgan murojaati shu joyning oʻzida hal boʻldi. Uchrashuvda yoshlar bandlik, kredit va boshqa masalalar yuzasidan qilgan bir qator murojaatlar ham oʻz yechimini topdi.

“Nayman” mahallasidagi yoʻlning yaroqsiz holatga kelib qolganligi toʻgʻrisidagi deputat Shermat Matchonovning tegishli tashkilotlarga qilgan murojaati eʼtiborga olindi va yoʻlning 2 kilometriga tosh yotqizildi.

“Beruniy” mahallasida yashovchi Qunduz Razzoqovaning yashash sharoitidagi muammolar yuzasidan qilgan murojaatiga asosan deputatlik guruhi aʼzolaridan Maysara Xudayberganova va Otajon Matniyozov murojaatchi bilan suhbatlashdi. Oʻrganish natijasida Qunduz Razzoqovaning turmush oʻrtogʻidan ajrashgani, yashashga uyi yoʻqligi sabab 1 nafar voyaga yetgan qizi bilan ijarada yashayotganligi aniqlandi. Murojaatchining moddiy tomondan qiyinchiliklarga duch kelayotgani va boshqa muammolari yuzasidan tegishli tashkilot rahbarlariga murojaat qilinib, masala hal etildi.

Shuningdek, deputatlarning saʼy-harakati bilan “Oqtepa” mahallasi Navoiy nomli koʻcha, 2-uy, 18-xonadonda yashovchi 1-guruh nogironi, “Temir daftar” roʻyxatida turuvchi Goʻzal Roʻzi­boyevaning murojaati ham ijobiy yechim topdi. G. Roʻziboyevaga “Saxovat va koʻmak” jamgʻarmasi hisobidan davolanishi uchun 12 million soʻm miqdorida moddiy yordam koʻrsatildi va uyiga 2,5 million soʻmlik temir eshik oʻrnatib berildi. 

“Nurli maskan” mahallasida yashovchi Jumamurod Ibragimovning davolanish uchun mablagʻdan qiynalayotgani toʻgʻrisidagi murojaati ham deputatlik guruhi tomonidan eʼtiborga olindi va unga 1 million 300 ming soʻmlik dori-darmon yetkazib berildi.

Bogʻotlik deputatlarimizning zimmalaridagi burch va masʼuliyatlarini chuqur his etgan holda faoliyat koʻrsatishi fuqarolarning yashash sharoitlarini yanada yaxshilashga, turmushlaridan mamnun boʻlishga olib kelayotgani bilan ham ahamiyatlidir. 

Zamira ABDULLAYEVA,

Xorazm viloyat kengashi matbuot kotibi