Har birimizning burchimiz

Mamlakatimizda shu kunlarda ahamiyati jihatidan nihoyatda katta va muhim jarayon davom etmoqda. Xalqimiz yangi tahrirdagi Konstitutsiya loyihasini qabul qilishga hozirlik koʻrmoqda. Bunda men ham “Adolat” SDP aʼzosi hamda xalq deputatlari viloyat kengashining deputati sifatida faol ishtirok etmoqdaman. Albatta saylovchilar bilan muloqotlarda Asosiy Qonunning loyihasi yuzasidan oʻz fikrlarimni bayon qilmoqdaman. Bunda kiritilayotgan oʻzgarishlarning mazmun-mohiyati toʻgʻrisidagi mulohazalar koʻpchilikda qiziqish uygʻotayotgani diqqatga sazovordir. Chunki ular xalq manfaatini koʻzlaydi. Masalan, 46-moddani olaylik. Unda shunday deyilgan: “Qonunda belgilangan pensiyalar, nafaqalar va boshqa turdagi ijtimoiy yordamning miqdorlari rasmiy belgilangan eng kam isteʼmol xarajatlaridan oz boʻlishi mumkin emas.” Biz yashayotgan davr — axborot asri. Asosiy qonun loyihasida mazkur masalaga ham alohida eʼtibor qaratilgan. 38-modda fikrimizni tasdiqlaydi: “Davlat internet jahon axborot tarmogʻidan foydalanishni taʼminlash uchun shart-sharoitlar yaratadi.” Demak hech bir fuqaro olamda yuz berayotgan yangiliklardan xabardor boʻlib, oʻrni kelganda oʻzi ham fikr bildirishi mumkin.

Yangilanayotgan Konstitutsiyada taʼlimga ham jiddiy eʼtibor qaratilgan. Bunga 52-modda yorqin misol boʻla oladi. Unda davlat oʻqituvchilarining shaʼni va qadr-qimmatini himoyalashi, ularning ijtimoiy va moddiy farovonligiga gʻamxoʻrlik qilish belgilangani hammani quvontiradi. Qisqasi. Asosiy qonun loyihasining har bir satri inson kamolotiga va baxt-saodatiga oid qoidalarni oʻzida mujassam etgan. Shuning uchun biz boʻlajak referendumda uni yoqlab ovoz beramiz.

Otabek Nazarov,

Xalq deputatlari Namangan viloyat Kengashidagi

“Adolat” SDP guruhi aʼzosi.