Har kunimiz shundan porloqdir

Mustaqillikning oʻtgan yillari mobaynida serquyosh mamlakatimiz har jihatdan katta davlatga aylanmoqda. Mutaxassislarning tahlillariga koʻra aholimiz 2040 yilga borib 50 million nafarga yetadi, jamiyatning yarmidan koʻpini yoshlar tashkil qiladi. Albatta ularga munosib yashash va hayot sharoiti yaratish uchun barqaror iqtisodiyot, xavfsiz davlat, samarali boshqaruv, ijtimoiy kafolatlar boʻlishi lozim. Shuning uchun ham kundalik hayotimizdagi yetilgan muammolarga mustahkam huquqiy poydevorni – Oʻzbekistonning yangilanayotgan Konstitutsiyasini yaratish evaziga erishiladi.Bugun Oʻzbekiston “Adolat” SDP Qashqadaryo viloyat Kengashi tomonidan Qarshi shahridagi 15-maktabda oʻtkazilgan “Har kunimiz shundan porloqdir” mavzusidagi pedagoglar, yoshlar va keng jamoatchilik vakillari bilan oʻtkazilgan uchrashuvda yangilanayotgan Konstitutsiyamiz mazmun-mohiyati haqida soʻz yuritildi.Targʻibot tadbirida fuqarolar koʻproq tibbiyot sohasiga oid savollar bilan murojaat qildilar.

-Darhaqiqat, Prezidentimiz sogʻliqni saqlash sohasini xalqqa yanada yaqinlashtirish uchun barcha chora-tadbirlarni koʻryaptilar,- dedi partiya viloyat Kengashi raisi, xalq deputatlari Qashqadaryo viloyat Kengashi deputati Ruiddin Raupov.-Endi yangilanayotgan Konstitutsiyaga muvofiq har bir fuqaro kafolatlangan bepul tibbiy xizmatlardan foydalanishi belgilanyapti. Umuman, aholi salomatligini asrash bilan bogʻliq normalar 4 barobar koʻpaytirilmoqda. Bu aholi sogʻligʻini ishonchli muhofaza etish hamda onalar va bolalar oʻlimi, yuqumli kasalliklar tahdidini bartaraf etishda juda muhim ahamiyatga egadir. Tibbiyot sohasi qancha tez rivojlansa xalqimizga shunchalik koʻp foydasi tegadi. Davlatimiz bu soha uchun mablagʻni ayamayapti. Biz ijtimoiy davlat barpo etish yoʻlida ish olib borayotgan ekanmiz yaqin kelajakda bunga erishamiz. Men yurtimizda amalga oshirilayotgan barcha islohotlar xalqimiz farovonligini taʼminlashga xizmat qilishini qalbdan xis etib turibman. Barchangizni 30-aprel kuni boʻlib oʻtadigan referendumda faol ishtirok etishga chaqiraman.Targʻibot tadbirida soʻzga chiqqan partiya faollari, huquqshunoslar, deputatlar yangilanayotgan Konstitutsiyada alohida bob va modda sifatida kiritilayotgan ijtimoiy, siyosiy, iqtisodiy huquq va normalar haqida aholiga keng tushuncha berdilar.

-Men “Adolat” SDP faollari tomonidan oʻtkazilgan bugungi uchrashuvdan qoniqish hosil qildim,- dedi tadbir ishtirokchilaridan biri Chamangul Muhammadiyeva.-Yangilanayotgan Konstitutsiyamiz mazmun-mohiyatini aniq va ravon tushuntirib oʻtishdi. Mahalladoshlarimiz bilan shu oy oxirida boʻlib oʻtadigan referendumga albatta qatnashamiz.

Akmal Xaitov,

“Adolat” SDP Qarshi shahar Kengashi raisi.