Huquqiy davlatni birgalikda quramiz!

Joylarda Oʻzbekiston Respublikasi Prezidentligiga nomzodlarning ishonchli vakillari saylovchilar bilan uchrashmoqda. Bugun “Adolat” sotsial-demokratik partiyasi tomonidan Prezidentlikka nomzod sifatida koʻrsatilgan Robaxon Maxmudovaning Buxoro viloyatidagi ishonchli vakili Maqsud Hamidovning jondorlik saylovchilar bilan uchrashuvi boʻlib oʻtdi.

Jondor tuman Moliya boʻlimining faollar zalida tashkil etilgan uchrashuvda Oliy Majlis Qonunchilik Palatasi deputati T.Choriyev, mahalla faollari, mehnat faxriylari, deputatlar, partiya faollari, yoshlar, xotin-qizlar, keng jamoatchilik va OAV vakillari ishtirok etishdi.

Tadbirni Oʻzbekiston “Adolat” sotsial-demokratik partiyasi Oliy Majlis Qonunchilik Palatasi deputati T.Choriyev kirish soʻzi bilan ochib berdi. U oʻz nutqida yigʻilganlarni yurtimizda kechayotgan oʻta muhim siyosiy jarayonlar bilan qizgʻin muborakbod etib, ushbu saylovoldi tadbirlarining kelgusida yurtimiz ravnaqi va fuqarolarimiz farovonligini taʼminlashdagi ahamiyatiga atroflicha toʻxtaldi.

Shundan soʻng, Oʻzbekiston Respublikasi Prezidentligiga “Adolat” sotsial-demokratik partiyasidan nomzod Robaxon Maxmudovaning Buxoro viloyati boʻyicha ishonchli vakili Maqsud Hamidov saylovchilarni nomzodning saylovoldi dasturidan oʻrin olgan 9 ustuvor yoʻnalishni oʻzida mujassam etgan inson, uning huquqlari, erkinliklari, mamlakat iqtisodiyotini barqaror rivojlanishini taʼminlash, jamiyatning innovatsion, intellektual salohiyati va inson kapitalini rivojlantirish kabi bir qator masalalar belgilab olinganligi boʻyicha saylovchilarga batafsil maʼlumot berdi.

Uchrashuv yakunida ishtirokchilar Oʻzbekiston Respublikasi Prezidentligiga “Adolat” sotsial-demokratik partiyasidan koʻrsatilgan nomzod Robaxon Maxmudovaning Saylovoldi dasturi yuzasidan oʻz fikr-mulohazalarini bildirdilar.

Mohigul Rahimqulova,

“Adolat”  SDP Buxoro viloyati Kengashi matbuot kotibi.