Huquqiy madaniyat — demokratik davlat tayanchi

Oʻzbekiston “Adolat” SDP Shahrisabz tuman Kengashi va tuman hokimligi tomonidan “Duxchi” MFY da “Jamiyatda yuksak huquqiy madaniyatni shakllantirishda siyosiy partiyalarning oʻrni” mavzusida davra suhbati tashkil etildi.

Maʼlumki, aholining huquqiy madaniyati va savodxonligini oshirish, jamiyatda huquqiy madaniyatni shakllantirish, korrupsiyaning har qanday koʻrinishlariga barham berish bugungi kunning dolzarb vazifalaridan hisoblanadi. Mazkur tadbirda ham asosan shular xususida fikr mulohaza yuritildi.

— Jamiyatda qonun ustuvorligini taʼminlash va huquqiy demokratik davlat barpo etishni oʻz oldiga maqsad qilib qoʻygan Oʻzbekiston “Adolat” SDP tomonidan bu masalaga alohida eʼtibor qaratilmoqda, — dedi xalq deputatlari Shahrisabz tuman Kengashi deputati Begali Baratov. — Huquqiy ong va huquqiy madaniyatni yuksaltirishning asosiy omillari va jamoatchilik bilan ishlash texnologiyalariga jiddiy ahamiyat berishimiz kerak.

— Adolat va qonun ustuvor boʻlgan jamiyatda hayotga, haqiqatga ishonch hissi kuchayadi, ijtimoiy tenglik, barqaror va muntazam rivojlanish taʼminlanadi, — deydi huquqshunos, partiya faoli Abdurahmat Kenboyev. — Fuqarolarimizning turli siyosiy-huquqiy madaniyatini rivojlantirishga qaratilgan targʻibot-tashviqot tadbirlari, shuningdek, “Siyosiy-huquqiy bilimlarni mustahkamlash – demokratik jamiyat poydevori” loyihasi doirasida joylarda siyosiy oʻquvlarni tashkil etilayotgani maqsadga muvofiqdir. Ayniqsa partiya tashkilotlarining davlat va jamoat tashkilotlari bilan hamkorligi ijobiy samara bermoqda. Fuqarolarning huquqiy ongi va huquqiy madaniyatini yuksaltirishga doir ishlar samaradorligini yanada takomillashtirish, odamlarning ijtimoiy-siyosiy oʻzgarishlar bilan uygʻun ravishda huquqiy bilimlarini oshirib borishning zamonaviy usullarini joriy etish, shuningdek, aholini, ayniqsa, yoshlarni zararli axborotlardan himoya qilish boʻyicha mustahkam huquqiy immunitetni shakllantirish muhim ahamiyat kasb etadi.

Tadbirda jamiyatda huquqiy ong va madaniyatning yuksalishi fuqarolarning qonunlarga itoat qilib,  siyosiy faolligini oshirishga xizmat qilishligi taʼkidlandi.

Jarayonda ishtirok etgan mahalla aʼzolarining mavzu yuzasidan bergan savollariga mutasaddilar batafsil javoblar berishdi.

Samandar Ixtiyorov,
“Adolat” SDP Shahrisabz tuman Kengashi raisi.