Huquqiy madaniyat — taraqqiyotning muhim omili

Yangi Oʻzbekistonda barcha sohalarda olib borilayotgan islohotlarning mohiyatini anglash, ushbu jarayonda faol ishtirok etish fuqarolarning huquqiy madaniyati har tomonlama yuqori boʻlishini taqozo etmoqda.

Bugun Oʻzbekiston “Adolat” SDP Koʻkdala tuman Kengashi tomonidan tumandagi Mikrokredit banki tadbirgohida “Jamiyatda yuksak huquqiy madaniyatni shakllantirishda siyosiy partiyalarning oʻrni” mavzusida tadbir boʻlib oʻtdi. Unda partiya faollari, deputatlar, huquq tartibot idoralari vakillari, keng jamoatchilik hamda ommaviy axborot vositalari xodimlari qatnashdi.

— Muhtaram Prezidentimizning 2022-yil 20-dekabrda Oliy Majlisga va xalqimizga yoʻllagan Murojaatnomasida alohida eʼtirof etilganidek, bugungi kunda jamiyatimizning har bir aʼzosi oʻz huquq va burchlarini hamda masʼuliyatini yaxshi bilishi kerak,- deydi xalq deputatlari Koʻkdala tuman Kengashi deputati Nizomiddin Mirzaqulov. — Shuni alohida qayd etish kerakki, fuqarolar huquq va erkinliklariga hurmat munosabatini shakllantirishga, aholining huquqiy ongi va huquqiy madaniyatini yuksaltirishga, jamiyatda fuqarolarning huquqiy savodxonligi darajasini oshirishga toʻsqinlik qiluvchi bir qator muammo va kamchiliklar ham saqlanib qolmoqda. Xususan, kundalik hayotda huquqiy madaniyatni yuksaltirishda, eng avvalo, huquqiy taʼlim va tarbiya borasidagi ishlar tizimli va uzviy olib borilishi zarur. Taʼlim muassasalarida huquq mavzusidagi darslarni koʻpaytirish kerak. Toki oʻsib kelayotgan ertangi avlod yuqori huquqiy madaniyatga ega boʻlsin.

- Kezi kelganda aytish lozimki, koʻp yillar davomida bu masalaga huquqni muhofaza qiluvchi organlar va ayrim davlat organlarining ishi sifatida qarab kelindi, — dedi huquqshunos, partiya faoli Abdurahmat Kengboyev. Bugun yosh avlodning huquqiy tarbiyasiga salbiy taʼsir koʻrsatuvchi omillarga nisbatan huquqiy immunitetni shakllantirish, serquyosh mamlakatimizda umrguzaronlik qilayotgan har bir shaxsda qonunlarga va odob-axloq qoidalariga hurmat, milliy qadriyatlarga sadoqat, huquqbuzarliklarga nisbatan murosasizlik hissini uygʻotish ishiga kompleks tarzda yondashuv lozim.

Aytish joizki, davlatda huquqiy ong va huquqiy madaniyatni yuksaltirib borish qonun ustuvorligini taʼminlash va qonuniylikni mustahkamlashning eng muhim shartlaridan biri hisoblanadi. Fuqarolarimizning dunyoqarashi, tafakkuri mamlakat hayotiga, yuz berayotgan yangilanishlarga mos ravishda oʻzgarib borishi huquqiy madaniyat tushunchasi bilan chambarchas bogʻliqdir. Tadbirda yoshlarning huquqiy tarbiyasiga salbiy taʼsir koʻrsatuvchi huquqbuzarliklarga nisbatan fuqarolarda murosasizlik hissini uygʻotish partiya tashkilotlari oldida turgan ustuvor vazifa ekanligi alohida taʼkidlandi.

Huquqiy madaniyat odamlarda huquqiy savodxonlik darajasi, qonunlarga boʻlgan hurmat bilan belgilanadi. Jamiyat aʼzolarining yuksak huquqiy ongi va huquqiy madaniyati davlat taraqqiyotini taʼminlaydi.

Tadbirda fuqarolarning huquqiy madaniyatini yuksaltirishga oid bir qator maʼruzalar tinglandi. Ayniqsa, yoshlardan tushgan koʻpgina savollarga masʼullar tomonidan atroflicha javob berilgani ikki tomon uchun ham foydali boʻldi.

Venera Xusainova,

“Adolat” SDP Koʻkdala tumani Kengashi raisi.