Ichki yoʻllarga beton qoplamalari yotqizilmoqda

Obodlik avvalo koʻngildan boshlanadi. Mamlakatimizda olib borilayotgan islohotlar “Obod qishloq Obod mahalla” atamalari hozirgi kunlarda ayniqsa quloqqa tez-tez chalinayotganligi sir emas. Bu borada tumanimizda salmoqli ishlar amalga oshirilmoqda. Besh yil oldingi Romitan bilan besh yildan keyin qanday oʻzgarishlar boʻlishi tasavvurga sigʻmaydi albatta.

 “Adolat” SDP Buxoro viloyati Kengashi deputati Marhabo Pardayeva “Muammo bilan yuzma-yuz” loyihasi doirasida saylovchilar bilan uchrashuvlar jarayonida tumandagi “Bobur” MFY hududidagi “Alpomish” koʻchasida fuqarolar bilan uchrashdi va bajarilishi zarur boʻlgan ishlar fuqarolar takliflariga asosan belgilab olindi.

Unga koʻra “Alpomish” koʻchasi hududidagi ichki yoʻllarni asfaltlashtirish masalasi birinchi oʻrinda qayd etildi.

“Adolat” SDP viloyat Kengashi deputati Marhabo Pardayevaning tashabbusi bilan obodonlashtirish ishlari shu kunning oʻzidayoq boshlab yuborildi. “Bobur” MFY hududidagi “Alpomish” koʻchasidan 1km ichki yoʻllarga beton qoplamalari yotqizish ishlari qizgʻin davom etmoqda.

R.Hayitov,

“Adolat” SDP  Romitan tuman Kengashi raisi.