Ijtimoiy rivojlanishning kafolati

Barchaga maʼlumki, soʻnggi yillarda xalqparvar davlatni barpo etish, inson huquq va manfaatlari, qadr-qimmatini yanada samarali taʼminlash mamlakatimizdagi tub islohotlarga mos konstitutsiyaviy-huquqiy makonni yaratish zaruratini yuzaga keltirgan edi.Shu maqsadda konstitutsiyaviy islohotlarni oʻtkazish bilan bogʻliq ishlarning samarali va puxta amalga oshirilishini taʼminlash maqsadida qator chora-tadbirlar amalga oshirildi. Yurtimizda davom etayotgan siyosiy jarayonda har bir fuqaroning oʻz fikr-mulohazalarini, takliflarini bildirishi uchun barcha qulayliklar yaratib berildi. Natijada, mana, xalqning orzu-istaklari toʻla aks etgan yangi Konstitutsiya yuzaga keldi. Bosh qomusimizga kiritiladigan barcha oʻzgartishlarning negizida Oʻzbekistonda kechayotgan islohotlar mohiyatini belgilovchi “Inson qadri uchun” ulugʻvor gʻoyasi yotganini koʻrishimiz mumkin. Konstitutsiyaviy oʻzgarishlarning asl mohiyati ham shu aslida.Mamlakat konstitutsiyasini takomillashtirish yurtimizda amalga oshirilayotgan islohotlarni yangi sifat darajasiga koʻtarish, xalqimizning turmush farovonligini yanada oshirish Oʻzbekistonning dunyodagi eng ilgʻor davlatlar qatoriga kirishi uchun ulkan imkoniyatlar yaratadi.

Yangilanayotgan Konstitutsiyaga koʻra, kuchli ijtimoiy himoya va muhtojlarga gʻamxoʻrlik – davlat siyosatining muhim yoʻnalishi boʻlib qoladi. Jumladan, kambagʻallikni qisqartirish, bandlikni taʼminlash, ishsizlikdan himoya qilish boʻyicha davlat oʻziga qator yangi majburiyatlar olmoqda. Bu esa bugungi kunda 2 million 200 ming ehtiyojmand oila moddiy yordam olishini kafolatlaydi.Davlat zimmasiga aholining ijtimoiy jihatdan ehtiyojmand toifalarining hayoti sifatini oshirish, nogironligi boʻlgan shaxslarning jamiyat va davlat hayotida toʻlaqonli ishtirok etishi va oʻz huquqlarini amalga oshirish uchun shart-sharoitlar yaratish majburiyati yuklanmoqda. Xulosa qilib aytganda, yangilanayotgan Konstitutsiya barqarorlik va ijtimoiy rivojlanish kafolati boʻla oladi.

Sanobar Mirsaidova,

Xalq deputatlari Samarqand viloyat Kengashi deputati.