Ijtimoiy tarmoqlarda koʻtarilgan muammo partiya tomonidan ijobiy hal etildi

Sir emaski, soʻnggi yillarda Davlatimiz rahbari tomonidan tibbiyot xodimlari mehnatini qadrlash va ragʻbatlantirish masalasiga alohida eʼtibor qaratilmoqda. Albatta, bundan koʻzlangan asosiy maqsad shifokorlarning oʻz kasbiga boʻlgan mehrini va malakasini oshirish barobarida aholiga koʻrsatilayotgan tibbiy xizmat sifatini yanada yaxshilashni nazarda tutadi.

Ammo, shu kunlarda ijtimoiy tarmoqlarda Xorazm viloyati Urganch va Bogʻot tumanlaridagi “Nevroplyus” klinikasining ishchilari oylik maosh kamligi tufayli ish tashlashi bilan bogʻliq xabarlar tarqalgani barcha tarmoq foydalanuvchilari kabi biz “adolatchilarning” ham eʼtiborimizni tortdi.

Maʼlumki, “Adolat” SDP Siyosiy Kengashi oʻz elektoratining asosiy qismini tashkil etuvchi sogʻliqni saqlash xodimlarining xalq va qonun oldidagi mavjud burch va majburiyatlarini alohida eʼtirof etgan xolda, soha xodimlarining huquq va erkinliklari ham har tomonlama toʻlaqonli himoya qilish borasida qator tashabbuslarni ilgari surib kelmoqda. Partiyamizning saylovoldi dasturida ham “Tibbiyot xodimi” maqomini mustahkamlash, ularning ijtimoiy muhofazasini taʼminlash va ularga nisbatan turli tazyiqlarning oldini olishga qaratilgan bir qancha maqsadlar belgilab olingan.

Shu bois, yuqoridagi holat yuzasidan partiyamizning Xorazm viloyati Kengashi xodimlari va hududdagi deputatlar hamda soha masʼullaridan tarkib topgan ishchi guruh vaziyatga oydinlik kiritish maqsadida voqea joyiga tashrif buyurdi.

Oʻzaro oʻrganishlar va koʻrilgan chora-tadbirlar natijasida Hindiston davlati bilan hamkorlikda tashkil etilgan mazkur xususiy tibbiyot muassasasi faoliyati bilan atroflicha tanishildi. Mavjud muammo yuzasidan muassasa maʼmuriyati bilan kelishilgan holda xodimlariga oylik maoshlari oshirilgan miqdorda, oʻz vaqtida toʻlab berilishiga kelishib olindi.

"Adolat" SDP
Matbuot xizmati