Ilmli ayol — jamiyat koʻzgusi

Xotin-qizlarimizga ilm-fanda, maʼrifat va taʼlim-tarbiyada oʻz faolliklarini namoyon qilishlariga koʻmaklashish, ijodiy izlanishlari uchun moddiy va maʼnaviy shart-sharoitlar yaratib berish, ularni zamonaviy texnika va texnologiyalarni oʻzlashtirishga daʼvat etish zarur. Albatta oila chirogʻi avvalo ayoldir. Xonadonning fayzi, oila aʼzolarining muvaffaqiyatlari, ular maʼnaviyatining darajasi, turmushining farovonligi asosan xotin-qizlarga bogʻliqdir. Shuning uchun ham ayollarning oiladagi mavqeyiga alohida eʼtibor berish kerak. Bugungi kunda mamlakatimiz rahbari tomonidan xotin-qizlarga katta eʼtibor qaratilib kelinmoqda.

Oʻzbek xotin-qizlariga xos hayo, shirin soʻzlilik, bagʻri kenglik, kechirimlilik, kamtarlik, iffatlilik, oqilalik singari olijanob fazilatlarini shakllantirish, bu borada uygʻun faoliyat yuritish nihoyatda muhimdir. Buxoro shahar Varaxsha mahalla fuqarolar yigʻini hududida xotin-qizlar 2360 ta boʻlib, 750 nafar xotin-qizlar ilm-maʼrifatli boʻlib jamiyatimizning turdi jabhalarida oʻz mehnat faoliyatlari bilan xizmat koʻrsatib kelmoqdalar. 45 nafar xotin-qizlarimiz oliy taʼlim dargohlarida oʻsib kelayotgan yosh avlodga ilm berib kelishmoqda. 17-nafar xotin-qizlarimiz tibbiyot muassasalarida shifokorlik vazifasini bajarib kelishmoqda. 25-nafar xotin-qizlarimiz tadbirkorlik faoliyatlarini amalga oshirib ishlab chiqarish sohalarida mehnat faoliyatlarini davom ettirib kelishmoqda.

Mana bugun biz Buxoro shahar Varaxsha MFY hududida “Adolat” SDP Buxoro shahar Kengashi raisi, Xalq deputatlari shahar Kengashi deputati Abdurauf Axmedov ishtirokida jamiyatda, oilada, qolaversa davlat organlarida bir-necha yillar uz mehnat faoliyatlari bilan xizmat qilib bugungi kunda yoshga doir nafaqada boʻlib, atrofga oʻz mehnatlari bilan ibrat boʻlib kelgan bir guruh onaxonlarning xonadonlarida ularning jamiyat, davlatning turli sohalarida xizmat qilib hamma havas qilsa arzigulik iz qoldirib oʻsib kelayotgan avlodga ibrat boʻlganliklari uchun minnatdorchiliklarimizni bildirib ularni yodga, esga olib ularning xonadonlarida esdalik sovgʻalari bilan tashrif buyurdik.

 Ilm-maʼrifatli ayollarni deputat Abdurauf Axmedov jamiyatda, oilada, yurtimizga qoʻshgan hissalarini inobatga olib taqdirlab bordilar.

Ayol kulsa, olam kuladi, degan yaxshi ibora bor. Ayolni quvontiradigan kuch esa avvalo, uning oilasi, qolaversa, mehnat maskanida topadigan qadri va eʼtiboridir. Ana shu ikki tomondan tan olinadigan, ardoqlanadigan mehr-u muhabbatdan ayol oziqlanishi tayin. Doimo sogʻ-salomat boʻlib, oilasida mehr, ishxonasida qadr topgan ayolning xotiri jam boʻladi. Yurtning omonligi ayol koʻnglini koʻtaradi, munis ayollarning qalbi-duolari esa yurtimizning doimo yomon koʻzlardan asraydi. Mustaqil yurtimizning oʻz qonunlari bor. Bugungi kun ayolining jamiki manfaati, onalik martabasi, sihat-salomatligi, ana shu muqaddas qonunlar bilan toʻla himoyalangan. Bizning eng oliy asosiy maqsadimiz va maslagimiz: Muhtarama   ayollarimiz doimo ezgu eʼtiborda, suyukli oilasi davrasida farzandlariga bosh boʻlsin. Uning koʻzida yosh qalbida armon boʻlmasin! Roʻshnolig-u osoyishtalik tilaylik ayolga. Ayol osoyishtaligi, yurt, jamiyat, xonadon osoyishtaligidir.

Shunday ekan, bugungi kunda yurtimiz rahbari tomonidan “Xotin qizlarga munosabat jamiyatimizning maʼnaviy, axloqiy yetukligining oʻlchovi boʻlib xizmat qilishi kerak,” degan soʻzlari magʻzida behad katta maʼno, qolaversa ulkan vazifa yotibdi. Shunday ekan yangidan qad rostlayotgan huquqiy davlatchiligimizda oʻzbek ayolining boy intellektual ijodiy quvvatidan ham toʻla foydalanish imkoniga ega boʻlamiz. Xotin-qizlarni yuqori maʼrifatga oshno qilishda, ilm-fanga jalb etishda, ularning madaniy saviyasini yuksaltirishda milliy qadriyatlarda tayanib ish olib borishimiz darkor.

  Gulnora Kenjayeva

“Adolat” SDP Buxoro shahar Kengashining “Ayollar qanoti” raisi,

partiya faoli