Imkoniyati cheklangan xotin-qizlar tadbirkor boʻla oladi

Qoʻl bilan berganga qush toʻymas,-deydi dono xalqimiz. Inson agar istasa imkoniyatlari maʼlum darajada cheklansa-da, istak yaxshi boʻlsa u ham tadbirkor boʻlishi, oʻz biznesini yoʻlga qoʻyish bilan bir qatorda ish topish istagida yurgan ko’plab insonlarni ish bilan taʼminlashi ham mumkin.

“Adolat” SDPdan Xalq deputatlari Qoʻshtepa tuman Kengashiga saylangan Xabibaxon Parpievani tinib-tinchimas inson sifatida qadrlashadi. U tumandagi imkoniyati cheklangan va kam taʼminlangan oila bekalari bilan suhbatlashar ekan, ularga xalqaro loyiha asosida biznes yuritish tartib qoidalarini targʻib qilmoqda.

Gap shundaki, Jahon banki, Yaponiya jamgʻarmasi, Oʻzbekiston xotin-qizlar qoʻmitasi, “Mehrjon” onalar va bolalar NNT hamkorligida respublikamizning Fargʻona va Jizzax viloyatlarida xayrli loyiha yoʻlga qoʻyildi. Mazkur loyihaga koʻra, Fargʻona viloyatining Qoʻshtepa, Furqat, Yozyovon va Soʻx tumanlarida istiqomat qiluvchi, “Ayollar daftari”da turgan 28 nafar ayollar 4 ta jamoaga birlashib, tadbirkorlik yoʻnalishlari tashkil etiladi. Ular 6 oy mobaynida oʻqitilib, yuqori natijaga erishgan jamoalar 65 million soʻmdan 200 000 000 soʻmgacha zarur uskunalar xarid qilish uchun begʻaraz moliyalashtirilishi koʻzda tutilgan.  

Qoʻshtepa tumanida deputatimiz X.Parpieva loyihaning ijtimoiy safarbar etuvchisi, mobilizator sifatida ana shunday ayollarni tanlab, tez kunlarda oʻqitish jarayonlarini amalga oshirish uchun harakatda.

"Adolat” SDP

Fargʻona viloyat kengashi Matbuot xizmati.