Innovatsion gʻoyalar bellashuvi

Bundan bir necha yil oldin “innovatsiya” soʻzi koʻpchilik uchun notanish tushuncha edi. Xorijdan kirib kelib, qulogʻimizga tez-tez chalina boshlagan bu atamani ahyon-ahyonda qoʻllay boshladik. Ammo koʻp oʻtmay Yangi Oʻzbekiston islohotlari asosida rivojlana boshlagan zamonaviy texnologiyalar va bilimlar sabab bugun “innovatsiya” til lugʻatimizdagi asosiy soʻzlardan biriga aylandi.

Prezidentimiz taʼkidlaganidek, “Innovatsiya — bu kelajak degani. Biz buyuk kelajagimizni barpo etishni aynan innovatsion gʻoyalar asosida boshlashimiz kerak. Innovatsion rivojlanish va raqamli iqtisodiyot yoʻliga oʻtishimiz bejiz emas. Chunki, zamon shiddat bilan rivojlanib borayotgan hozirgi davrda kim yutadi? Yangi fikr, yangi gʻoyaga, innovatsiyaga tayangan davlat yutadi". Bu soʻzlar amalda ham oʻz isbotini topa boshladi. Harakatlar strategiyasida aynan innovatsiyalar masalasiga alohida urgʻu berildi.

Samarqand tumanida joylashgan 16-,17-,10-,22-,12-umumtaʼlim maktablari oʻrtasida “Yosh ixtirochilar” nomli bellashuv tashkil etildi. Oʻzbekiston “Adolat” SDP Samarqand tuman Kengashi tashabbusi bilan oʻtkazilayotgan mazkur bellashuv doirasida oʻquvchi yoshlarning yaratgan innovatsion gʻoyalaridan iborat koʻrgazmalari tashkil etildi va bellashuv soʻngida barcha qatnashchilarga Kengash tomonidan faxriy yorliklar taqdim etildi.

Ushbu tashkillashtirilgan bellashuv, kelgusida albatta, oʻquvchilarning yanada kamol topishlari va yetuk mutaxassis boʻlishlariga debocha boʻlib xizmat qiladi.

Z.Quddusova,
“Adolat” SDP Samarqand tuman Kengashi raisi.